مۇعالىمدەردى «بولاشاق» باعدارلاماسىمەن وقىتۋ كەرەك - بەردىبەك ساپاربايەۆ

الماتى. قازاقپارات - الماتىدا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ مەكتەپ ديرەكتورلارىمەن كەزدەستى، دەپ حابارلايدى قازاقپارات ءتىلشىسى.

 «ءبىز مۇعالىمدەردىڭ ماتەريالدىق جاعدايىن ەسكەرۋىمىز كەرەك. وتكەن جىلى ۇستازداردىڭ جالاقىسى ءوستى. تامىز كونفەرەنسياسىندا پرەزيدەنت ۇكىمەتكە مۇعالىمدەردىڭ جالاقىسىن 2020 -جىلدان باستاپ ءتورت جىل ىشىندە ەكى ەسەگە ارتتىرۋدى تاپسىرعان بولاتىن. وتكەن جىلدارمەن سالىستىرعاندا قازىر مۇعالىمدەردىڭ ەڭبەكاقىسى جامان ەمەس. سونىمەن قاتار ءبىز مۇعالىمدەردى «بولاشاق» باعدارلاماسىمەن دايىنداۋىمىز كەرەك»، - بەردىبەك ساپاربايەۆتىڭ ايتىنشا، اۋىلدىق جەرلەردە ءبىلىم ساپاسى تومەن.

«بۇل - وتە وزەكتى ماسەلە. اۋىلدا مۇعالىمدەر جەتىسپەيدى. وندا ءبىلىم بەرۋ دەڭگەيى ناشارلاپ بارادى. سەبەبى وندا ءبىر مۇعالىم گەوگرافيا، ماتەماتيكا، بيولوگيا پاندەرىنەن ساباق بەرە بەرەدى. مۇنداي كورىنىس اسىرەسە شاعىن مەكتەپتەردە ءجيى كەزدەسەدى. سوندىقتان ءبىز اۋىلدىق جەردە جۇمىس ىستەيتىن مۇعالىمدەردىڭ جاعدايىن جاساۋىمىز كەرەك. «ديپلوممەن اۋىلعا» باعدارلاماسى تۋرالى ايتىپ جاتىرمىز، ءبىراق، وكىنىشكە قاراي، بۇل باعدارلاما كەي جەرلەردە جۇزەگە اسىپ جاتقان جوق. بارعان ۇستازدارعا باسپانا بەرمەيدى، جالداپ تۇرۋ اقىسىن تولەمەيدى. قازىر وسى ماسەلە بويىنشا ءبىز جەرگىلىكتى بيلىكپەن جۇمىس ىستەپ جاتىرمىز. مەن بۇل پروبلەمالاردىڭ ءبارىن بىلەمىن. مەن دە اكىم بولعانمىن. وسىنىڭ ءبارىن قاداعالايمىز»، - دەدى مەكتەپ ديرەكتورلارىمەن كەزدەسۋدە ب. ساپاربايەۆ.

سونىمەن قاتار، پرەمەر- ءمينيستردىڭ ورىنباسارى مەكتەپ وقۋشىلاردىڭ اتا- اناسىمەن تىعىز بايلانىستا بولۋى ءتيىس ەكەنىن تىلگە تيەك ەتتى.

بۇعان دەيىن ب. ساپاربايەۆ قالانىڭ بەلسەندى جاستارىمەن كەزدەسكەن بولاتىن.

اۆتور: الما مۇقانوۆا