مۇعالىمدەردى ارتىق جۇمىستارعا تارتقاندارعا ايىپپۇل سالىنادى
وسىلايشا، پەداگوگتارعا قاتىستى شامادان تىس جۇكتەمە ازايتىلماق. بۇل تۋرالى پارلامەنت ماجىلىسىندە «پەداگوگ مارتەبەسى تۋرالى» زاڭ جوباسىنىڭ تانىستىرىلىمىنان كەيىن ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسى مۇعالىمدەردى كەرەك ەمەس ءارتۇرلى جۇمىستارعا تارتۋعا توسقاۋىل قويۋ ماسەلەسىن كوتەردى. بۇل رەتتە قاپتاعان ەسەپتەر مەن ارتىق جۇمىستار بارشىلىق. سوندىقتان بۇل باعىتتا ءتيىستى شارالاردى اتقارامىز. زاڭ جوباسىندا قاجەتتى سانكتسيالار قاراستىرىلدى»، - دەدى مينيستر.
بەلگىلى بولعانداي، مۇعالىمدەردى ولارعا قاتىسى جوق جۇمىستارعا تارتقانى ءۇشىن جانە ارتىق ەسەپتىلىككە جەككەنى ءۇشىن 20 دان 120 ا ە ك-كە دەيىن ايىپپۇل قاراستىرىلعان. سونىمەن قاتار، وسىنداي ايىپپۇل جۇمىس ۋاقىتىنىڭ نورماسىن زاڭسىز اسىرعانى ءۇشىن دە ەسكەرىلگەن.
«بۇل شارالار ءوزىنىڭ ۇلكەن سەپتىگىن تيگىزەدى دەپ ويلايمىن. مىسالى، ديرەكتورلار، اكىمدىكتەر جانە باسقا مەملەكەتتىك ورگاندارعا قاتىستى. بۇگىندە مەكتەپكە كىمدەر كەلمەيدى؟ تەكسەرۋشى ورگاندار دا از ەمەس. كەرەك ەمەس ءارتۇرلى اقپارات سۇراسا، مۇعالىمدەردى جۇمىسىنا ءتان ەمەس شارالارعا تارتاتىن بولسا، وندا ءتيىستى جازا قولدانۋعا مۇمكىندىك تۋدى. زاڭ جوباسى قابىلدانعاننان كەيىن ءبىراز جاقسى وزگەرىستەر بولادى دەپ سانايمىن»، - دەدى ا. ايماعامبەتوۆ.
اۆتور: رۋسلان عابباسوۆ