مۇعالىمدەر ءۇشىن جاڭا مەملەكەتتىك سىيلىق تاعايىندالادى

نۇر-سۇلتان. قازاقپارات - پارلامەنت ماجىلىسىندە «پەداگوگ مارتەبەسى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى، مۇعالىم مەن وقۋشىعا جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنىڭ تانىستىرىلىمى ءوتتى، دەپ حابارلايدى قازاقپارات ءتىلشىسى.

«مۇعالىمدەرگە قاتىستى ماتەريالدىق ەمەس ىنتالاندىرۋ شارالارى قاراستىرىلعان. ءبىرىنشى كەزەكتە بالاباقشادان ورىن بەرۋ ماسەلەسى ەسكەرىلگەن. سونىمەن قاتار، «قازاقستاننىڭ ەڭبەك سىڭىرگەن ۇستازى» مەملەكەتتىك ماراپاتىنىڭ جاڭا ءتۇرىن ەنگىزۋ دە بار»، - دەدى ق ر ءبىلىم جانە عىلىم ءمينيسترى اسحات ايماعامبەتوۆ.

ونىڭ سوزىنە قاراعاندا، اسكەري قىزمەتكە شاقىرۋدى كەيىنگە قالدىرۋ ۇسىنىسى دا نازارعا الىنىپ وتىر.

«اۋىلدىق جەردە جۇمىس ىستەيتىن مۇعالىمدەردى ەڭبەكاقىسىن ارتتىرۋ، «ۇزدىك پەداگوگ»، «ج و و- نىڭ ۇزدىك وقىتۋشىسى» گرانتتارى سياقتى قولدانىستاعى بارلىق الەۋمەتتىك كەپىلدىكتەر دە مىندەتتى تۇردە زاڭ جوباسىندا ساقتالدى»، - دەدى ا. ايماعامبەتوۆ.

سونىمەن قاتار، ول مەملەكەت باسشىسىنىڭ تاپسىرماسى اياسىندا الداعى ءتورت جىلدا مۇعالىمدەردىڭ ەڭبەكاقىسىن ەكى ەسەگە ارتتىرۋ كوزدەلگەنىن ەسكە سالدى. الداعى جىلدان باستاپ پەداگوگتاردىڭ جالاقىسى 25 پايىزعا وسەدى.