داريعا نازاربايەۆا ءدىني كوشباسشىلاردىڭ وكىلدەرىمەن كەزدەستى
بۇل جونىندە سەناتتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
سەنات ءتوراعاسى، حاتشىلىق باسشىسى داريعا نازاربايەۆا ۆاتيكان مەملەكەتىنىڭ ءدىنارالىق ديالوگ جونىندەگى پاپا كەڭەسى يسلام ماسەلەلەرى جونىندەگى بيۋروسىنىڭ باسشىسى، مونسەنور حالەد اكاشەمەن كەزدەسۋدە ەلىمىزدەگى بەيبىتشىلىك پەن كەلىسىمدى نىعايتۋداعى قازاقستاندىق كاتوليكتەردىڭ ۇلەسىن اتاپ ءوتتى.
ح. اكاشەنىڭ ايتۋىنشا كيەلى تاق الەمدەگى كونفەسسياارالىق جانە ءدىنارالىق كەلىسىمدى ۇدايى قولداپ كەلەدى. سوندىقتان قازىرگى كەزدە پاپا كەڭەسى كونفەسسياارالىق جانە وركەنيەتارالىق ءۇن قاتىسۋدى دامىتۋ جونىندەگى ن. نازاربايەۆ ورتالىعىمەن ىنتىماقتاستىق مەموراندۋمىن جاساۋعا بايلانىستى جۇمىستار ءجۇرىپ جاتىر.
پاپا كەڭەسىنىڭ وكىلى حالەد اكاشە سونداي-اق 2001-جىلى ريم پاپاسىنىڭ قازاقستانعا كەلگەنىن ايتا كەلىپ، بۇل تاريحي ساپاردىڭ وتكەنىنە 20 جىل تولعانىن اتاپ ءوتتى. وسىعان وراي 2021-جىلى وتەتىن VII سەزگە پونتيفيكتىڭ كەلۋى ىقتيمال.
حاتشىلىق باسشىسى ءيزرايلدىڭ اشكەنازيلىك باس راۆۆينىنىڭ وكىلى، نەتانيا ورتالىعىنىڭ راۆۆينى م. لاۋ جانە يزرايلدىڭ سەفاردتىق باس راۆۆينىنىڭ وكىلى، يەرۋساليمدەگى وڭتۇستىك امەريكا قاۋىمىنىڭ راۆۆينى ي. لورينتسپەن كەزدەسۋدە حاتشىلىقتىڭ الداعى جوسپارلارى تۋرالى ءسوز ەتتى. سەنات ءتوراعاسىنىڭ ايتۋىنشا وسى جىلدار ارالىعىندا سەزد سەنىم جانە ءوزارا تۇسىنىستىك شارالارىن قالىپتاستىرۋدىڭ ەرەكشە الاڭىنا اينالدى.
«وسى ەلدە وتكىزگەن بىرنەشە ساعاتتا بارلىق ءدىن جانە ۇلت وكىلدەرىنە كورسەتىلگەن جىلى شىراي مەن دوستىق پەيىلگە كۋا بولدىق. ءسىز باسقارىپ وتىرعان حاتشىلىق الەمدى تولعاندىرىپ وتىرعان كونفەسسياارالىق جانە ءدىنارالىق تاقىرىپتاردى تالقىلاۋعا دايىن ەكەنىن كورسەتتى. بۇل ءۇن قاتىسۋ الاڭى قازىرگى كەزدەگى بارلىق كەلەڭسىزدىكتەرگە تويتارىس بەرە الاتىن قورعان بولاتىنىنا ءۇمىت ارتامىز»، - دەپ اتاپ ءوتتى يزرايلدىڭ اشكەنازيلىك باس راۆۆينىنىڭ وكىلى، نەتانيا ورتالىعىنىڭ راۆۆينى م. لاۋ.
قىتاي بۋدداشىلار قاۋىمداستىعى باس حاتشىسىنىڭ ورىنباسارى شي چۋنۆەن جاڭادان قۇرىلعان كونفەسسياارالىق جانە وركەنيەتارالىق ءۇن قاتىسۋدى دامىتۋدىڭ ن. نازاربايەۆ ورتالىعىنىڭ جۇمىسىن اتاپ ءوتىپ، قىتاي الەمدىك جانە ءداستۇرلى دىندەر ليدەرلەرى سەزىنىڭ جوعارى باستامالارىن تولىق قولدايتىنىن جەتكىزدى.
سەنات ءتوراعاسى الەمدىك جانە ءداستۇرلى دىندەر ليدەرلەرى سەزى جۇمىسىنىڭ ماڭىزىن اتاپ ءوتتى.
«بۇگىنگى كۇنى سەزد - بارلىق دىندەر، حالىقارالىق ۇيىمدار، ساياسي قايراتكەرلەر مەن ساراپشىلاردىڭ باسىن قوسقان ەرەكشە وكىلەتتى ءۇن قاتىسۋ الاڭى. ءدىني كوشباسشىلاردىڭ كەزدەسۋى جاقسى ءداستۇر بولىپ وتىر. العاشىندا جاڭالىق بولعانى راس. بۇگىنگى كۇنى بارلىعى دا مۇمكىن ەكەنىنە كۋا بولدىق. باستىسى – ءۇزۋ نيەت»، - دەدى د. نازاربايەۆا.