تۇركىستاندا العاش رەت «ماحاببات، قىزىق مول جىلدار» رومانى ساحنالاندى
سپەكتەكال ءازىلحان نۇرشايىقوۆ رومانىنىڭ جەلىسى بويىنشا قويىلدى، دەپ حابارلايدى قازاقپارات ءتىلشىسى.
قويىلىمدى تۇركىستان وبلىسى اكىمىنىڭ ورىنباسارى ساكەن قالقامانوۆ پەن وبلىستىق مادەنيەت باسقارماسى باسشىسىنىڭ ورىنباسارى ءازىمحان قويلىبايەۆ باستاعان زيالى قاۋىم وكىلدەرى مەن قالا تۇرعىندارى جانە تەاتردىڭ تۇراقتى كورەرمەندەرى بىرگە تاماشالادى. رومان جەلىسىندە سوناۋ سوعىستان كەيىنگى جىلداردىڭ وقيعاسى ياعني، البىرت جاستىق، رومانتيكا، ماحاببات تاقىرىبى قوزعالادى.
اق پەن قارانىڭ، ادالدىق پەن ارامدىقتىڭ، سۇلۋلىق پەن دورەكىلىكتىڭ قايشىلىعى ءومىردىڭ بىتىسپەس كۇرەسى ەكەنى داۋسىز. سپەكتاكلدە سوعىستان امان قايتقان ەربول مەن ادال دا، سۇلۋ، سەزىمى دە ءوزى سەكىلدى مولدىرەگەن مەڭتايدىڭ اراسىنداعى ماحاببات ارقىلى جازۋشى ماڭگى جاستىقتى بەينەلەيدى. ولاردىڭ شىنايى سەزىمى مەن ماحابباتتارى، ءبىر بىرىنە دەگەن ادالدىعىن شەبەر سۋرەتتەپ كورسەتەدى. سپەكتاكلدە رولدەردى سومداعان ارتىستەردىڭ بارلىعى دا كەيىپكەرلەرىن شىنايى شىعارۋىمەن كورەرمەندەردىڭ قوشەمەتىنە بولەندى.
اۆتور: اينۇر اقبايەۆا