ەلوردالىق اتا- انالار بالاباقشاداعى تاماق بەرۋ پروتسەسىن كامەرا ارقىلى باقىلاي الادى
«وتكەن جىلى مەكتەپتەگى تاماقتاندىرۋ ماسەلەسىنە باسا نازار اۋدارساق، بيىل مەكتەپكە دەيىنگى ۇيىمدارعا جۇرگىزىلەتىن مونيتورينگتى كۇشەيتۋدى كوزدەپ وتىرمىز. تاماقتاندىرۋ ساپاسىن قاداعالاۋ ماقساتىندا بەلسەندى اتا- انالاردىڭ، قالالىق ءماسليحات وكىلدەرىنىڭ، «نۇر وتان» پارتياسى مۇشەلەرى مەن «ادالدىق الاڭى» وكىلدەرىنىڭ قاتىسۋىمەن اۋقىمدى جۇمىستار جۇرگىزىلدى. بۇل رەتتە باسىمدىق مەكتەپ اسحانالارىنا بەرىلدى. بىرىنشىدەن، تاماقتاندىرۋ پروتسەسىن ۇيىمداستىرۋ ءۇشىن مەكتەپتەر كونكۋرس جاريالامايدى. بۇل جۇمىس اكتيۆتەر جانە مەملەكەتتىك ساتىپ الۋ باسقارماسى دەڭگەيىندە ءبىرىڭعاي كونكۋرس ارقىلى وتكىزىلەدى. ەكىنشىدەن، ءار مەكتەپ اسحاناسىنا بەينەباقىلاۋ كامەرالارى ورناتىلدى. سوندىقتان، اتا- انالار تاراپىنان قانداي دا ءبىر سۇراقتار بولسا، ولار كامەرا ارقىلى تاماقتاندىرۋ ساپاسىن باقىلاي الادى»، - دەدى ءانۋار جانعوزين ەلوردا اكىمدىگىنىڭ باسپا ءسوز ورتالىعىندا وتكەن بريفينگتە.
قالالىق ءبىلىم باسقارماسى باسشىسىنىڭ ايتۋىنشا، ۇشىنشىدەن، مەكتەپتەردە قازىرگى ۋاقىتتا قولما- قول اقشاسىز تولەم جاساۋ جۇيەسى ەنگىزىلىپ جاتىر. ياعني، بالالار اسحاناعا كەلگەن كەزدە اقشالاي ەمەس، كارتوچكا ارقىلى تولەي الادى.
«تورتىنشىدەن، مونيتورينگتىڭ ناتيجەسىندە 85 مەكتەپ اراسىندا 30 مەكتەپتە عانا كەمشىلىك انىقتالعان جوق. قالعان مەكتەپتەر تاماقتاندىرۋ بويىنشا ازىق- تۇلىك جەتكىزۋشىلەردى اۋىستىرىپ، قايتادان كونكۋرس جاريالادى. ءوز كەزەگىندە وسىعان دەيىن ءار مەكتەپتە كونكۋرسقا ءبىر نەمەسە ەكى جەتكىزۋشى قاتىسسا، ءقازىر ولاردىڭ سانى بەس نەمەسە التىعا ارتقان. ياعني، باسەكە بار»، - دەدى ول.
ءانۋار جانعوزيننىڭ ايتۋىنا قاراعاندا، بالالاردى تاماقتاندىرۋ بويىنشا وتكەن جىلعا قاراعاندا شاعىمدار سانى 35 پايىزعا ازايعان.
«وسى جۇمىستى ءبىز جالعاستىرامىز. قالالىق مونيتورينگ توبىن مەتكەپكە دەيىنگى ۇيىمداردا تاماقتاندىرۋ ساپاسىن قاداعالاۋ ماقساتىندا كەڭەيتىپ وتىرمىز. بەلسەندى اتا- انالاردى وسى جۇمىسقا اتسالىسۋعا شاقىرامىز. 20 - قىركۇيەككە دەيىن قالالىق ءبىلىم باسقارماسىنىڭ سايتىندا مونيتورينگكە قاتىسقىسى كەلەتىن اتا- انالاردان ءوتىنىم قابىلدايتىن ايدار اشىلادى. ارينە، وسى باعىتتى «نۇر وتان» پارتياسى مۇشەلەرى مەن «ادالدىق الاڭى» وكىلدەرى قولداپ وتىر»، - دەدى ءانۋار جانعوزين.
اۆتور: ايان بەكەن ۇلى