الەمدىك ءدىن ليدەرلەرى ەلباسى ەڭبەگىن ارنايى قۇجاتپەن ماڭگىگە قالدىرماق
«جۇمىس توبىنىڭ بارلىق مۇشەلەرى ءبىر اۋىزدان سەزدىڭ (الەمدىك جانە ءداستۇرلى دىندەر ليدەرلەرى سەزى) بىرەگەي ەكەندىگىن جانە ونىڭ 2021-جىلى قازاقستان رەسپۋبليكاسى تاۋەلسىزدىگىنىڭ 30 جىلدىعىمەن تۇسپا-تۇس وتەتىندىگىن اتاپ ءوتتى. قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ سەزدى شاقىرۋداعى، ونىڭ يدەيالارىن الەمدىك ارەنادا ىلگەرىلەتۋدەگى ىرگەلى ۇلەسى ايرىقشا اتالىپ ءوتىلدى»، - دەدى الەمدىك جانە ءداستۇرلى دىندەر ليدەرلەرى سەزى XVIII حاتشىلىعىنىڭ وتىرىسىندا ق ر اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ.
وسى ورايدا، ۆيتسە-مينيستر اتالعان جۇمىس توبى تاراپىنان ەلباسىنىڭ سەزد جۇمىسىن ىلگەرىلەتۋدەگى ەرەن ەڭبەگىن ارنايى قۇجات ارقىلى ماڭگىگە ەستە قالدىرۋ تۋرالى ۇسىنىس بولعانىن ايتتى.
«وسىناۋ باستاما اياسىندا جۇمىس توبىنىڭ مۇشەلەرى ارنايى قۇجاتتىڭ ءتۇرى مەن فورماتىن ويلاستىرۋعا دايىن ەكەندىكتەرىن ءبىلدىردى. اتالعان قۇجاتتى 2021-جىلى وتەتىن 7- سەزدتە قابىلداۋعا بولار ەدى. وندا سەزد اۆتورى نۇرسۇلتان نازاربايەۆتىڭ وسىناۋ بىرەگەي جاھاندىق تۇعىرنامامىزدى قۇرۋداعى ايرىقشا ءرولى كورىنىس تابادى»، - دەدى م. ءازىلحانوۆ.
ايتا كەتەيىك، بۇگىنگى وتىرىستا الەمدىك جانە ءداستۇرلى دىندەر ليدەرلەرىنىڭ VI سەز قورىتىندىلارى مەن حاتشىلىق قىزمەتىنىڭ كەلەشەگى بويىنشا پىكىر الماسىلۋدا. سودان كەيىن 2021-جىلعى الەمدىك جانە ءداستۇرلى دىندەر ليدەرلەرىنىڭ VII سەزىن وتكىزۋ بويىنشا ۇسىنىستار تالقىلانىپ جاتىر.