بۇيرەك ساۋلىعىنا قاتىستى كەڭەستەر
الەمدىك ستاتيستيكادا بۇيرەكتىڭ سوزىلمالى اۋرۋى ولىمگە الىپ كەلەتىن التىنشى سەبەپ ەكەنى كورسەتىلگەن. جالپى بۇيرەك دەرتىنە شالدىققانداردىڭ سانى - 850 ميلليون بولسا، جىل سايىن ولاردىڭ 2,4 ميلليونى ومىرىمەن قوش ايتىسادى.
بۇيرەكتەرىمىزدىڭ ءاربىرى شامامەن 10-12 س م جانە 150-200 گرام سالماقتى قۇرايدى. قان مەن سۇيەكتەرىمىز ءۇشىن قاجەتتى گورمونداردى بولەدى. بۇيرەك كۇنىنە 24 ساعات ارتىق سۇيىقتىق پەن زات الماسۋدان قالعان توكسيندەردى شىعارىپ وتىرادى. ساۋ بۇيرەك تاۋلىگىنە قاندى 300 رەت تازالاۋعا قاۋقارلى. ياعني، ورتاشا ەسەپپەن 1500 ليتر قان ءار كۇن سايىن بۇيرەك ارقىلى ءوتىپ تۇرادى.
كوبىمىز ءىسۋ، باس اۋرۋى مەن شارشاۋدىڭ ءوزى - دارىگەرگە كورىنۋدىڭ العاشقى بەلگىلەرى ەكەنىن بىلە بەرمەيمىز. اعزامىزدىڭ سۇزگىسى بولعان بۇيرەككە - ينفەكسيا، سوزىلمالى دەرتتەر، ناشار ەكولوگيالىق احۋال، دارىلەر، تاعامدىق توكسيندەر، تەمەكى تارتۋ، الكوگول، سالاۋاتتى ءومىر سالتىن ساقتاماۋدىڭ بارلىعى دا ءوز اسەرىن تيگىزەدى. بۇيرەك اۋرۋلارى كوبىنەسە بىلىنبەي ءجۇرىپ، پايدا بولادى. الايدا، ادامدار سول بەلگىلەردىڭ نەسەپ- جىنىس جۇيەسىنە تىكەلەي قاتىسى بارىنا نازار اۋدارا بەرمەيدى ەكەن. وكىنىشتى-اق!
وسىنشالىقتى ومىرلىك ماڭىزدى مۇشەنىڭ ساۋلىعى ءبىرىنشى رەتتە قاراستىرىلۋى قاجەتتى ماسەلە. دارىگەرلەر بۇيرەكتىڭ 70-80 پايىزدىق دەڭگەيدە زاقىمدانعانعا دەيىن بەلگى بەرە بەرمەيتىندىگىن ايتىپ، تەكسەرىلىپ تۇرۋعا كەڭەس بەرەدى. اسىرەسە 40 جاستان اسقاندارعا جىلىنا ءبىر رەت تەكسەرىلىپ تۇرعانى ءجون. بۇيرەك جەتىسپەۋشىلىگى ەرتە انىقتالعان جاعدايدا الدىن الۋعا بولاتىن جانە ىلگەرىلەۋىن تەجەۋگە بولاتىن كەسەل. ال اسقىنعان جاعدايى مۇگەدەكتىككە، ءتىپتى ودان دا قايعىلى ناتيجەگە اپارۋى مۇمكىن.
ەستە ساقتاڭىز. بۇيرەگى اۋىراتىن ادامداردىڭ %96 ى ۋاقىت وتكىزىپ السا، جۇرەك-قان تامىر اۋرۋلارىنا شالدىعاتىن بولادى.
بۇيرەك ساۋلىعىن ساقتايمىن دەسەڭىز، تومەندەگى كەڭەستەرگە جۇگىنىڭىز:
✔ كوپتەپ سۋ ءىشىڭىز. بۇيرەك دەنەدەگى قالدىقتاردى ءسۇزىپ شىعارۋ ءۇشىن سۋعا قاجەتتىلىگى بار.
✔ تەمەكى تارتپاڭىز. تەمەكى ىشىندەگى حيميالىق ەلەمەنتتەر بۇيرەك ارقىلى زارمەن سىرتقا شىعادى. وسى ارادا بۇيرەك جاسۋشالارىنا اسەر ەتىپ قاتەرلى ىسىكتىڭ قالىپتاسۋىنا سەبەپ بولۋى مۇمكىن.
✔ اۋرۋدى باساتىن دارىلەردى كوپ تۇتىنباڭىز. اۋرۋدى باساتىن دارىلەردى ۇزاق ۋاقىت كوپ تۇتىنعان جاعدايدا بۇيرەك قاتەرلى ىسىگىنە جول اشۋى مۇمكىن. جالپى ءدارى-دارمەك اتاۋلىنى بەت الدى كوپ قولدانباعان ءجون.
✔ سالاۋاتتى ءومىر سالتىن ۇستانىڭىز. دەنە جاتتىعۋلارىن جاساپ ءجۇرىڭىز، سالاۋاتتى قورەكتەنىڭىز.
✔ تاعامدارداعى تۇز مولشەرىن مەيلىنشە ازايتىڭىز. تۇزدىڭ كۇندىك مولشەرى 6 گرامنان اسپاعانى ءجون.
✔ ارتىق سالماق بۇيرەكتىڭ جاۋى. سالماقتى قالىپتى دەڭگەيدە ۇستاڭىز.
✔ قانداعى شەكەر مولشەرىن، قان قىسىمىن باقىلاۋدا ۇستاڭىز.
✔ كۇنىنە ءبىر الما جەپ تۇرۋ بۇيرەككە پايدالى كەلەدى.
✔ اسقاباق جانە اسقاباق ءدانى قانداعى قانت دەڭگەيىن رەتتەپ، بۇيرەكتى تازالاۋ تۇرعىسىنان جانە تاس پايدا بولۋىنىڭ الدىن الۋدا پايدالى.
✔ اقجەلەك (پەترۋشكا) بۇيرەكتەردىڭ توكسيندەردى شىعارۋىن، جاقسى جۇمىس ىستەۋىن قامتاماسىز ەتەدى. جىنىستىق جانە جۇيكە جۇيەلەرىنە بولىمدى اسەرى بار.
✔ بۇيرەك اۋرۋلارىنا گەنەتيكالىق بەيىمدىلىگىڭىز جوعارى بولسا، دارىگەرگە قارالىپ تۇرىڭىز.
ەڭ باستىسى، دەنساۋلىعىڭىزعا نەمقۇرايلى قاراماڭىز.
دارىگەر- ۋرولوگ سايران باتىربەكوۆ