ق ر باس پروكۋراتۋراسى اقجارقىن تۇرلىبايدى ەلگە قايتارۋعا تۇسىنىك بەردى

نۇر-سۇلتان. قازاقپارات - قىتايدا اقجارقىن تۇرلىبايعا قاتىستى ايىپتاۋ ۇكىمى شىققان جاعدايدا، قازاقستان تاراپى ونىڭ جازاسىن ەلىمىز اۋماعىندا وتەۋى بويىنشا ساۋال جولدايدى.

بۇل تۋرالى ق ر باس پروكۋرورىنىڭ ورىنباسارى مارات احمەتجانوۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە ول ۇكىمگە شاعىم ءتۇسىرۋ كەزەڭىندە. اتاپ ايتقاندا، قىتايمەن ارادا بىزدە سوتتالعانداردى بەرۋ تۋرالى ەكىجاقتى كەلىسىم بار. ەندى قىتايلىق سوت تورەلىگىنىڭ سوڭعى كەسىمىن كۇتەمىز. ەگەر دە اقتاۋ ۇكىمى شىقسا، وندا وتە جاقسى بولار ەدى»، - دەدى م. احمەتجانوۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.

ق ر باس پروكۋرورى ورىنباسارىنىڭ سوزىنە قاراعاندا، ەگەر ا. تۇرلىباي سوتتى بولسا، وندا ول ءتيىستى ءوتىنىش جاساۋعا قۇقىلى. وسىنىڭ نەگىزىندە ق ر باس پروكۋراتۋراسى ونىڭ جازاسىن وتەۋ مەرزىمىن قازاقستان اۋماعىندا جالعاستىرۋعا بايلانىستى قۇجاتتى جولدايتىن بولادى.

ەسكە سالا كەتەيىك، 21 جاستاعى قازاق قىزى اقجارقىن تۇرلىباي 2014-جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلدى، اقجارقىن ول تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋانجوۋ سوتى اقجارقىن تۇرلىبايدى ەسىرتكى كونترابانداسىمەن ايىپتاپ، ءومىر بويىنا باس بوستاندىعىنان ايىردى. 2016-جىلى 7- ساۋىردە اپەللياتسيالىق ساتىداعى سوت اقجارقىن تۇرلىبايدى ءومىر بويىنا باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى قاۋلى ەتكەن بولاتىن.

جاقىندا قازاقستان پرەزيدەنتى قاسىم-جومارت توقايەۆ قىتايعا مەملەكەتتىك ساپارى بارىسىندا وسى ەل تۇرمەسىندە جاتقان وتانداسىمىز اقجارقىن تۇرلىبايدىڭ ماسەلەسىن كوتەردى.

اۆتور: رۋسلان عابباسوۆ