ەڭبەك مينيسترلىگىنىڭ سايتىندا ۆيرتۋالدى كەڭەسشى قىزمەتى ىسكە قوسىلدى

نۇر-سۇلتان. قازاقپارات - الەۋمەتتىك- ەڭبەك سالاسىنداعى مەملەكەتتىك قىزمەتتەردى الۋ تۋرالى سۇراقتارعا جاۋاپ العىسى كەلەتىن قازاقستاندىقتار ءۇشىن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ سايتىندا «ۆيرتۋالدى كونسۋلتانت» اتتى جاڭا سەرۆيس ىسكە قوسىلدى، دەپ حابارلايدى قازاقپارات.

«ونلاين رەجىمدە كونسۋلتاتسيا الۋ ءۇشىن enbek.gov.kz ۆەب-سايتىنا كىرۋ جەتكىلىكتى، مۇندا تومەنگى وڭ جاق بۇرىشتا كونسۋلتانتتىڭ بەلگىشەسى كورىنەدى، ونى باسقان كەزدە مينيسترلىكتىڭ قىزمەتتەرى تۋرالى سۇراقتارعا جاۋاپ بەرىلەدى»، دەلىنگەن حابارلامادا.

مىسالى، مازىردەن «جۇمىسپەن قامتۋ» ءبولىمىن تاڭداپ، ادامدارعا جۇمىسپەن قامتۋعا جاردەمدەسۋدىڭ بەلسەندى شارالارىنا قاتىسۋعا جولداما بەرۋ؛ جۇمىس ىزدەپ جۇرگەن ادامداردى جۇمىسسىز رەتىندە تىركەۋ جانە باسقا دا قىزمەتتەر بويىنشا كونسۋلتاتسيا الۋعا بولادى.

وسىعان ۇقساس كونسۋلتانت ەلەكتروندىق ەڭبەك بيرجاسىنىڭ سايتىندا جانە @enbek_bot مەكەنجايى بويىنشا Telegram-دا قولجەتىمدى.

بۇل قىزمەتتى ازىرلەۋ ءۇشىن سۇراقتاردى نەيروندىق جەلىلەر ارقىلى قاراپايىم تىلدە الۋعا مۇمكىندىك بەرەتىن الدىڭعى قاتارلى تالداۋ تەحنولوگياسى قولدانىلدى.