مەملەكەت باسشىسى پەتروپاۆلداعى س. م. كيروۆ اتىنداعى زاۋىتتا بولدى

پەتروپاۆل. قازاقپارات - قاسىم- جومارت توقايەۆ س. م. كيروۆ اتىنداعى زاۋىتقا باردى، دەپ حابارلايدى اقوردا.

مەملەكەت باسشىسى كاسىپورىننىڭ ونىمدەرىمەن تانىسىپ، كوپقاباتتى باسپا تاقتاسىن شىعاراتىن جانە بولشەكتەردى قۇراستىراتىن سەحتاردى ارالاپ كوردى. پرەزيدەنتكە كومپانيانىڭ قازىرگى جۇمىستارىنىڭ ەسەبى بەرىلىپ، كاسىپورىننىڭ تەحنولوگيالىق تۇرعىدان ودان ءارى جاڭعىرتىلۋ جوسپارى باياندالدى.

كاسىپورىن ديرەكتورى امانگەلدى ارعىنبايەۆتىڭ ايتۋىنشا، ەلىمىزدە العاش رەت كوپقاباتتى باسپا تاقتاسىن ءوندىرۋ ءىسىنىڭ جەدەل ىسكە قوسىلۋى الەمدىك ستاندارتقا سايكەس بۇيىمدار شىعارۋعا مۇمكىندىك بەرەدى. بۇل رەسپۋبليكا ەكونوميكاسىنىڭ ءتۇرلى سالالارىندا قولدانىلىپ، كەلەشەكتە ەكسپورتقا شىعارىلاتىن بولادى.

500-دەن استام ادام جۇمىس ىستەيتىن كاسىپورىن وتاندىق ماشينا جاساۋ سالاسىنىڭ كوشباسشىسى سانالادى. زاۋىت تەمىر جول، مۇناي- گاز، ەنەرگەتيكا سالالارىندا پايدالانۋ ءۇشىن ازاماتتىق جانە اسكەري ماقساتقا ارنالعان 100-دەن استام ءونىم ءتۇرىن شىعارادى.

قازاقستان پرەزيدەنتى «رادۋگا» ج ش س- نىڭ وندىرىستىك الەۋەتىمەن دە تانىستى.

مەملەكەت باسشىسى وڭىرگە جۇمىس ساپارى بارىسىندا مەتالل پلاستيكالىق ونىمدەر شىعاراتىن «رادۋگا» زاۋىتىنا باردى.

قاسىم- جومارت توقايەۆقا وندىرىستىك سەحتار تانىستىرىلدى. پرەزيدەنتكە كومپانيانىڭ جۇمىسى تۋرالى مالىمەت بەرىلىپ، شىعاراتىن ونىمدەرى كورسەتىلدى.

كاسىپورىن ديرەكتورى دميتريي شاراپايەۆ زاۋىتتا 1,5 مىڭ ادام جۇمىس ىستەيتىنىن، ءونىمنىڭ 500-دەن استام ءتۇرى شىعارىلاتىنىن ايتتى. كومپانيا شىعاراتىن ونىمدەر ەلىمىزدىڭ بارلىق ايماقتارىنا جونەلتىلەدى، سونداي- اق، رەسەيدىڭ ءىرى قالالارىنا دا ەكسپورتتالادى.