شاڭىراعىم شايقالماسىن دەسەڭىز...
شاڭىراقتىڭ شايقالماي، ءتۇتىنى ءتۇزۋ ۇشۋى دا ۇيدەگى وتاناسىنا بايلانىستى. وتباسىن ساقتاپ قالۋى ءۇشىن ايەل زاتى ءبىراز نارسەنى قۇربان ەتۋگە دە بارادى. نەكەنى بۇزباي، بەرىك ەتە تۇسەمىن دەگەن ايەل زاتى مىناداي كەلەڭسىزدىكتەرگە جول بەرمەۋى ءتيىس.
جوقتان - بار
ءبىر دانا انا بىلاي دەگەن ەكەن: «ايەل رەتىندەگى سەنىڭ ەڭ قايىرلى ءىسىڭ - بارىمەن بازار بوپ ءومىر ءسۇرۋ». ءوز ازاماتىڭىز از تاپسا دا، كوپ تاپسا دا، بارىنا شۇكىر دەپ، قاناعات قىلىپ، دالاعا شاشپاي، ۇيگە اكەلگەن ءناپاقاسىنىڭ بەرەكەسىن كىرگىزۋ ايەل ادامعا بايلانىستى. ونىڭ جۇمىسىن، ەڭبەگىن باعالايتىنىڭىزدى ءسات سايىن كورسەتىپ وتىرىڭىز. وتباسىلىق بيۋدجەتىڭىزدى بارىنشا پايدالى جاعىنا جوسپارلاي ءبىلىڭىز.
ماڭداي تەرمەن كەلگەن ءار تيىندى ورنى-ورنىمەن قولدانۋعا داعدالىنىڭىز. ۇنەمى جوق دەپ جىلاي بەرسەڭىز، ودان سايىن جوعالا بەرەدى، ونىڭ ورنىنا وتباسىن اش-جالاڭاش قالدىرماي، قولىنان كەلگەنىنشا اسىراپ-باعىپ جۇرگەن ەر ازاماتىڭىزعا العىس ايتىپ وتىرعان ابزال. بىرنەشە اي بويى ءبىر ادەمى سومكەگە قولىڭىز جەتپەي، ارمانداپ جۇرگەن بولارسىز، ءبىراق بۇل ءسىزدىڭ وتباسىڭىزدىڭ باقىتىنان، ەرىڭىزدىڭ رازىلىعىنان ماڭىزدى ما؟
ەشتەڭەگە كوڭىل تولماۋ
ءۇيىڭىز ۇنەمى شاشىلىپ جاتادى، كورشىلەر دە ۇنەمى شۋلاپ جۇرەدى، ارىپتەستەرىڭىزبەن دە ءتىل تابىسا المايسىز، بالاڭىز دا مازاسىزدانىپ شىرىلداي بەرەدى، سىرت كەلبەتىڭىزگە دە كوڭىلىڭىز تولمايدى - وسىنىڭ بارلىعى جۇيكەڭىزدى جۇقارتىپ جىبەردى مە؟
ۇيگە كۇيەۋىڭىز كەلگەندە وسىنىڭ بارلىعىنا جينالىپ قالعان اشۋدى كۇيەۋ ارقىلى شىعارىپ العانىڭىزدى دا بايقاماي قالاسىز. ءوزىڭىزدى ونىڭ ورنىنا قويىپ كورىڭىزشى.
نەگاتيۆكە تولعان اۋرادا ول ءوزىن قالاي سەزىنەدى؟ سىزگە بارىنشا كومەكتەسكىسى كەلسە دە، ءسىزدىڭ اشۋىڭىزدىڭ، وكپەڭىزدىڭ شەگى جوق.
ءار ەر ادام ءوز زايىبىنىڭ باقىتتى كۇن كەشكەنىن قالايدى. ال ءسىزدىڭ مىنا ءتۇرىڭىزدى كورىپ ول نەنى دۇرىس ىستمەدىم دەپ ءوزىن كىنالاپ، ىشتەي جانىن جەگىدەي جەۋى مۇمكىن. وزىڭىزبەن بىرگە ونى دا قۇردىمعا الىپ كەتكىڭىز كەلمەسە، بارلىق ىسكە ءپوزيتيۆتى كوزقاراس تانىتۋعا تىرىسىڭىز. باقىت تا، باقىتسىزدىق تا ءبىر كۇنمەن ولشەنبەيدى عوي. بىرەر كۇن تۋعان كولەڭكەلى كۇنگە بولا وتباسىڭىزدىڭ بەرەكەسىن كەتىرمەگەيسىز.
جارىڭىز نەشىنشى ورىندا؟
ءسىز ءۇشىن ەڭ باستىسى نە؟ اتا-اناڭىز، دوستارىڭىز، ءوزىڭىزدى دامىتۋ، ەڭبەك جولى؟ ال كۇيەۋىڭىز شە؟ ومىرىڭىزدە ونىڭ ورنى قاي جەردە، ەڭ سوڭعى ورىن ەمەس پە؟ كۇندەردىڭ كۇنىندە «سەنىڭ ماعان بار-جوعىڭ ءبارىبىر» دەۋگە دەيىن جەتەسىز.
ال بىرنەشە جىلدان كەيىن ول سىزگە وسىلاي ايتسا شە؟ ءوزىڭىزدى باعالاۋىڭىزعا قانشالىقتى اسەر ەتەر ەدى؟ ومىردە ەر ازاماتىڭىز ەڭ ءبىرىنشى ورىندا تۇرۋى كەرەك، ءتىپتى بالالارعا قاراعاندا جارىڭىزعا دەگەن ماحابباتىڭىز كۇشتىرەك بولسا، ءبارى دە جاقسى بولادى. كەيبىرەۋلەر بۇل پىكىرمەن كەلىسپەۋى مۇمكىن، الايدا باقىتتى جانۇيانىڭ سىرى وسىندا جاتىر. قاشقاقتاۋ ول سىزبەن بىرگە بولىپ، سىرىن ءبولىسىپ، قاراپايىم ءبىر كۇنى قالاي وتكەنىن بايانداپ اڭگىمەلەسكىسى كەلگەن كەزدە «باسىم اۋىرىپ تۇر»، «شارشاپ تۇرمىن» دەگەن سەكىلدى سىلتاۋلارىڭىز دايىن تۇرسا نە جاي عانا باعامدى ءبىلىپ ءجۇرسىن دەپ ءوزىڭىزدى ودان الشاق ۇستاساڭىز، كەرىسىنشە الىستاعان ۇستىنە الىستاي تۇسەسىز. نەشە جاسقا كەلسەڭىزدەر دە ەرىڭىزگە بار نازارىڭىزدى بولۋگە تىرىسىڭىز.