قىرعىزستان مەن تاجىكستان شەكاراسىندا اتىس بولىپ، ءبىر اسكەري قىزمەتشى قازا تاپتى
قىرعىزدىڭ «كابار» ۇلتتىق اقپارات اگەنتتىگى ق ر م ش ق باسپا ءسوز قىزمەتىنە سىلتەمە جاساي وتىرىپ تاراتقان مالىمەتىنە ساي، تاجىك تاراپى ءبىرىنشى بولىپ وق اتقان. وقيعا سالدارىنان قىرعىزستاندىق شەكاراشى قازا بولعان.
«تاجىكستان ازاماتتارى شەكارا بەلگىلەنبەگەن اۋماقتا قۇرىلىس جۇمىستارىن جۇرگىزۋدى باستاعان. وعان جاۋاپ رەتىندە قىرعىز ازاماتى دا سول جەردە ورنالاسقان ءوز ءۇيىنىڭ اۋماعىندا قورشاۋ تۇرعىزا باستاعان. اتىستىڭ تۋۋىنا وسى وقيعا سەبەپ بولعان» دەلىنگەن ق ر م ش ق حابارلاماسىندا.
ال، تاجىكستاننىڭ «حوۆار» ۇلتتىق اقپارات اگەنتتىگىنىڭ تر ۇقك شەكارا اسكەرىنىڭ باسپا ءسوز ورتالىعىنا سىلتەمە جاساي وتىرىپ حابارلاۋىنشا، قىرعىز تاراپى سوگدى وبلىسى بوبودجون گافۋروۆ اۋدانى وۆچي-كالاچا جاماعاتى باحور ماحاللاسىنداعى سپورت الاڭىندا بەلگىسىز نىساننىڭ قۇرىلىس جۇمىسىن باستاعان.
باحور ماحاللاسىنىڭ تۇرعىندارى قىرعىز ازاماتتارىنان قۇرىلىستى توقتاتۋدى سۇراعان. وقيعا سالدارىنان اتىس بولىپ، بىرنەشە تاجىك ازاماتىنا وق تيگەن. قىرعىزستان مەن تاجىكستاننىڭ شەكارا قىزمەتىنىڭ وكىلدەرى ماسەلەنىڭ ۋشىعىپ كەتپەۋى ءۇشىن كەلىسسوزدەر جۇرگىزىپ جاتىر.