الەم چەمپيوناتىنا وزگە ەل اتىنان قاتىسىپ جاتقان قانداستارىمىز كىمدەر؟

نۇر-سۇلتان. قازاقپارات - بۇگىندە نۇر-سۇلتان قالاسىندا ءوتىپ جاتقان كۇرەس تۇرلەرىنەن الەم چەمپيوناتىندا وزگە ەلدىڭ اتىنان باق سىنايتىن قازاق بالۋاندارى بار.

كورشى وزبەكستان مەن قىتايدان بولەك مۇحيتتىڭ ارعى بەتىندەگى برازيليا ەلىنىڭ ساپىندا دا سپورتشىلارىمىز ونەر كورسەتىپ ءجۇر.

► مارات گاريپوۆ

تۋعان جىلى: 1985-جىلى

تۋعان جەرى: قازاقستان، تاراز قالاسى

ازاماتتىعى: برازيليا

سپورت ءتۇرى: گرەك-ريم كۇرەسى

وليمپيادا ويىندارىنا ونەر كورسەتۋدى ارمان ەتكەن مارات قازىرگى تاڭدا لاتىن امەريكاسىندا ءومىر ءسۇرىپ جاتىر. قازاقستاننىڭ اتىنان وليمپياداعا قاتىسا المايتىنىن جاقسى تۇسىنگەن بالۋان برازيليا فەدەراتسياسىنىڭ جاساعان ۇسىنىسىن قابىل الىپ، سول جەردە ەڭبەك ەتۋدە. 2016-جىلى بالا كەزگى ارمانىنا ءبىر تابان جاقىن بولعان. ءبىراق ريو-دە جانەيرودا وتكەن وليمپيادانىڭ الدىندا اۋىر جاراقات الىپ، ءدۇبىرلى دودانى وتكىزىپ الدى.

ەندىگى ماقساتى -  2020-جىلى وتەتىن توكيو وليمپياداسى. برازيليا قۇراماسىنىڭ ساپىندا نيۋ-دەليدە وتكەن الەم بىرىنشىلىگىندە قولا الدى. ال وتكەن جىلى پەرۋ ەلىندە ۇيىمداستىرىلعان پانامەريكا چەمپيوناتىندا جۇلدەگەرلەر قاتارىنان كورىنە ءبىلدى.

► ءۋاليحان سەرىك ۇلى

تۋعان جىلى: 1992-جىلى

تۋعان جەرى: قىتاي، شىنجاڭ ولكەسى، تارباعاتاي ايماعى

ازاماتتىعى: قىتاي

سپورت ءتۇرى: گرەك-ريم كۇرەسى

قىتاي قۇراماسى ساپىندا دا قازاق بالۋانى بار. ول - قىتايدىڭ شىنجاڭ ولكەسى، تارباعاتاي ايماعىندا تۋىپ-وسكەن ءۋاليحان سەرىك ۇلى. گرەك-ريم كۇرەسىنەن 60 كەلىگە دەيىنگى سالماقتا بەلدەسەدى.

اسپان استى ەلىنىڭ ىشكى بىرىنشىلىگىندە ەكى رەت قولا جۇلدەگە قول جەتكىزگەن. 2017-جىلى قىتاي سپارتاكياداسىندا قولا مەدال الىپ كوزگە تۇسكەن. سودان بەرى قىتايلىق باپكەرلەردىڭ كوڭىلىنەن شىعىپ، يندونەزياداعى ازيا ويىندارىندا باق سىنادى.

2018-جىلى ۆەنگريانىڭ بۋداپەشت قالاسىندا وتكەن كۇرەس تۇرلەرىنەن الەم بىرىنشىلىگىندە ۇزدىك ۇشىكتەن كورىندى.

ايتا كەتەرلىگى، ۋاليحانمەن بىرگە قازاقستاندىق بالۋان ايدوس سۇلتانعالي دا جۇلدەگەرلەر قاتارىنان كورىنگەن ەدى.

► ەلمۇرات تاسمۇراتوۆ

تۋعان جىلى: 1991 -جىل 12 جەلتوقسان

تۋعان جەرى: وزبەكستان، تاشكەنت وبلىسى، بوستاندىق اۋدانى، قىزىق تۋ اۋىلى

ازاماتتىعى: وزبەكستان

سپورت ءتۇرى: گرەك- ريم كۇرەسى

1955-جىلعا دەيىن قازاق ك س ر شىمكەنت وبلىسىنا كىرگەن بوستاندىق اۋدانىنداعى قىزىل تۋ اۋىلىنىڭ تۋماسى. 1991-جىلى تۋعان ەلمۇرات 13 جاسىندا ەلگە ورالىپ، بەكزات ساتتارحانوۆ اتىنداعى مەكتەپ-ينتەرناتتا ءبىلىم الادى. كۇرەسكە يكەمى بار بولعانىمەن قۇراما باپكەرلەرى ءتۇرلى سىلتاۋلارمەن ونى شاقىرتپايدى.

ۇلتتىق قۇرامانىڭ ساپىنا ىلىنە الماعان ەلمۇراتتىڭ وزەگىن وكىنىش ورتەپ، وزبەكستانعا قايتۋعا بەل بۋادى. قازىر وزبەكستاننىڭ اتىنان سىنعا ءتۇسىپ جۇرگەن ەلمۇرات ءبىراز بەلەستى باعىندىرىپ ۇلگەردى. ءۇش بىردەي الەم چەمپيوناتىندا ءۇش ءتۇرلى سالماقتا جۇلدە سالدى.

بۇدان بولەك التى مارتە ازيا چەمپيوناتىندا جۇلدەگەرلەر قاتارىنان كورىنىپ، ونىڭ تورتەۋىندە التىننان القا تاققان.

مانسابىنداعى ەڭ ۇلكەن جەتىستىگى دەپ 2016-جىلعى وليمپيادا ويىندارىنىڭ قولا جۇلدەسىن ايتۋعا بولادى.

نۇر-سۇلتان قالاسىندا ءوتىپ جاتقان الەم چەمپيوناتىندا 63 كەلىگە دەيىن سالماقتا التىننان باستى ۇمىتكەرلەردىڭ ءبىرى.

► جۇماتاي شۋبايەۆ

تۋعان جەرى: قازاقستان، قاراعاندى وبلىسى، جاڭاارقا اۋدانى، جەڭىس اۋىلى

سپورت ءتۇرى: ەركىن كۇرەس

ازاماتتىعى: بەلارۋس

شەتەلدە ەڭبەك ەتىپ جۇرگەن قانداستارىمىزعا جۇماتاي شۋبايەۆتى دا قوسۋعا بولادى. 30 جىلدان بەرى بەلارۋس ەلىندە ءومىر ءسۇرىپ جاتقان ول ەركىن كۇرەستەن ۇلتتىق قۇرامانى باپتايدى.

سونداي-اق گرودنەنسك وبلىسىنىڭ باس باپكەرى قىزمەتىن اتقارادى. شيرەك عاسىردان استام ۋاقىت ەتكەن ەڭبەگى بەلارۋس ەلىندە باعالاندى.

جۇماتاي شۋبايەۆ قازىر «بەلارۋس رەسپۋبليكاسىنىڭ ەڭبەك سىڭىرگەن جاتتىقتىرۋشىسى». ۇزاق جىلدان بەرى شەتەلدە تۇرسا دا وتانىنان قول ءۇزىپ قالعان جوق. سوڭعى ەكى جىلدا قازاقستان مەن بەلارۋس قۇرامالارى بىرلەسكەن بىرنەشە وقۋ-جاتتىعۋ جيىنىن وتكىزگەن. الماتىدا، تارازدا ەكى ەلدىڭ سپورتشىلارى بىرگە دايىندالىپ، تاجىريبە الماستى.

Massaget.kz