ورالدا پوليتسيا قىزمەتكەرى تاياقشاسىن اۆتوكولىككە لاقتىردى
بۇل وقيعا بەينەجازبا ارقىلى الەۋمەتتىك جەلىلەردە تارالدى. بەينەجازبادا ايەل داۋسى جولعا بەلگى قويىلىپ، جۇمىستار جاسالىپ جاتقاندىقتان، ءوزىنىڭ ۇيىنە بارۋعا اۆتوكولىگىن نۇرلان دۇيسەنوۆ دەگەن پوليتسيا قىزمەتكەرىنىڭ جىبەرمەگەنىن ايتادى.
ونىمەن قويماي، پوليتسيا قىزمەتكەرى اۆتوكولىكتىڭ كىلتىن الىپ العان. ب ق و پوليتسيا دەپارتامەنتىنىڭ باسپا ءسوز قىزمەتى ءمالىم ەتكەنىندەي، پاترۋلدىك قىزمەت ينسپەكتورى، پوليتسيا لەيتەنانتى ن. دۇيسەنوۆ 13 -قىركۇيەك كۇنى ەۋرازيا مەن ن. نازاربايەۆ داڭعىلدارى قيىلىسىندا تاياقشانىڭ كومەگىمەن جول قوزعالىسىن رەتتەگەن.
اتاپ ايتقاندا، جاياۋ جۇرگىنشى وتكەلىن جارىقتاندىرۋ ءۇشىن مەتالل كونسترۋكسياسىن ورناتۋ جۇمىستارى جۇرگىزىلۋىنە بايلانىستى ن. نازاربايەۆ داڭعىلىنان المازوۆ كوشەسىنە قاراي جول قوزعالىسى شەكتەلگەن.
قىزمەتتىك مىندەتىن اتقارۋ كەزىندە ن. دۇيسەنوۆ مەملەكەتتىك قىزمەتشىلەردىڭ قىزمەت ەتيكاسى ەرەجەسىن بۇزۋعا جول بەرگەن. ول 1990 -جىلعى ەليزاۆەتا پوكاتيلوعا تيەسىلى «فولكسۆاگەن پاسسات» اۆتوكولىگىنىڭ كىلتىن الىپ العان. سونداي-اق تىيىم سالىنعان بەلگىگە قاراماستان، وسى تۇستان توقتاماي ءوتىپ كەتكەن «گازەل» اۆتوكولىگىنىڭ (ينكاسساتور) ارتىنان تاياقشاسىن لاقتىرعان. «اتالعان وقيعا بويىنشا قىزمەتتىك تەكسەرۋ جۇرگىزىلىپ، ونىڭ قورىتىندىسى كەيىن ايتىلاتىن بولادى»، دەپ حابارلادى دەپارتامەنتتىڭ باسپا ءسوز قىزمەتىنەن.
اۆتور: ەلجان ەرالى