جەمقورلىق فاكتىسىن حابارلاعان تۇرعىندارعا قانشا قارجى تولەندى

نۇر-سۇلتان. قازاقپارات - سىبايلاس جەمقورلىق فاكتىسى تۋرالى تەلەفون ارقىلى حابارلاۋ جاعدايلارى ارتىپ كەلەدى.

بۇل تۋرالى سىبايلاس جەمقورلىققا قارسى ءىس-قيمىل اگەنتتىگىندەگى بريفينگتە ءمالىم بولدى، دەپ حابارلايدى قازاقپارات ءتىلشىسى.

«call-ورتالىققا كەلىپ تۇسكەن ءاربىر حابارلاما ۋاقتىلى تەكسەرىلەدى. بيىلعى جىلى سىبايلاس جەمقورلىق فاكتىلەرى تۋرالى 378 قوڭىراۋ تىركەلدى، حابارلامالاردى تەكسەرۋ ناتيجەلەرى بويىنشا اشىلعان قىلمىستىق ىستەر سانى ارتۋدا. ەگەر بىلتىرعى جىلى نەبارى 32 ءىس قوزعالسا، اعىمداعى جىلدىڭ 7 ايى ىشىندە سوتقا دەيىنگى 31 تەرگەپ-تەكسەرۋ باستالدى. وسىنداي حابارلامالار بويىنشا 15 ادامنىڭ پارا الۋ كەزىندەگى قىلمىسى اشكەرەلەندى. ولاردىڭ اراسىندا قۇقىق قورعاۋ ورگاندارىنىڭ قىزمەتكەرلەرى، جەرگىلىكتى اتقارۋشى ورگانداردىڭ جانە ءبىلىم بەرۋ سالاسىنىڭ قىزمەتشىلەرى بار. 5 ادام سوتتالدى»، - دەدى اگەنتتىكتىڭ اكىمشىلىك-قۇقىقتىق دەپارتامەنتى قۇجات اينالىمى باسقارماسىنىڭ باسشىسى قۋانىش مىرزاعالي.

ونىڭ سوزىنە قاراعاندا، سىبايلاس جەمقورلىق قۇقىق بۇزۋشىلىقتار تۋرالى حابارلاعان نەمەسە قىلمىسقا قارسى ءىس-قيمىلدا وزگە دە جولمەن جاردەمدەسكەن ازاماتتارعا ءبىرجولعى اقشالاي سىياقى تولەنەدى. ياعني، ەگەر كىنالى ادامعا قاتىستى سوتتىڭ اكىمشىلىك جازا قولدانۋ تۋرالى قاۋلىسى نەمەسە ايىپتاۋ ۇكىمى زاڭدى كۇشىنە ەنگەن بولسا، ءتيىستى ىنتالاندىرۋ ەسكەرىلگەن.

تاراتىلعان مالىمەتكە قاراعاندا، بيىل سىبايلاس جەمقورلىق قۇقىق بۇزۋشىلىقتار تۋرالى، ونىڭ ىشىندە call-ورتالىق ارقىلى حابارلاعان 116 ازامات 17,7 ميلليون تەڭگە سوماسىندا ىنتالاندىرىلدى.

بۇدان بۇرىن حابارلانعانداي، سىبايلاس جەمقورلىققا قارسى ءىس-قيمىل اگەنتتىگىندە ەل تۇرعىندارى قاي سالالارداعى زاڭسىزدىقتار بويىنشا كوبىرەك شاعىمداناتىنىن جاريا ەتتى.

اۆتور: رۋسلان عابباسوۆ