19:26, 12 - قىركۇيەك 2019 | GMT +6
ۇ ق ك وپەراتسياسى: ادامداردى بوپسالايتىن قىلمىستىق توپ ۇستالدى
نۇر-سۇلتان. قازاقپارات – ق ر ۇ ق ك نۇر-سۇلتان قالاسى بويىنشا دەپارتامەنتى ەتنوستىق قىلمىستىق توپتىڭ قۇقىققا قارسى ءىس-ارەكەتىنىڭ جولىن كەستى.
بۇل تۋرالى قازاقپارات كوميتەتتىڭ باسپا ءسوز قىزمەتىنە سىلتەمە جاساپ حابارلايدى.
قىلمىستىق توپ بيزنەس-ورتا وكىلدەرىنىڭ ءومىرى مەن دەنساۋلىعىنا زيان كەلتىرۋ قاتەرى ارقىلى اقشا قاراجاتتارىن جۇيەلى تۇردە بوپسالاۋمەن اينالىسقان.
اعىمداعى جىلدىڭ 10 -قىركۇيەگىندە ەلوردادا ارنايى وپەراتسيا وتكىزىلىپ، اتالعان قىلمىستىق توپتىڭ جەتەكشىسى مەن مۇشەلەرى كاسىپكەردەن جالعان قارىزىن قايتارۋ ءۇشىن «Toyota» ماركالى اۆتوكولىگىن قورقىتىپ الۋ كەزىندە ۇستالعان.
فيگۋرانتتاردى ۇستاۋ بارىسىندا 11 وق-ءدارىسى بار «ماكاروۆ» تاپانشاسى جانە 5 وق-ءدارىسى بار تراۆماتيكالىق تاپانشا تابىلدى.
ۇستالعاندار نۇر-سۇلتان قالاسىنىڭ پ د ۋاقىتشا ۇستاۋ يزولياتورىنا قامالدى، سوتقا دەيىنگى تەرگەۋ جۇرگىزىلۋدە.