ەلىمىزدىڭ قاي سالاسىندا جەمقورلىق كوپ

نۇر- سۇلتان. قازاقپارات - سىبايلاس جەمقورلىققا قارسى ءىس- قيمىل اگەنتتىگىندە ەل تۇرعىندارى قاي سالالارداعى زاڭسىزدىقتار بويىنشا كوبىرەك شاعىمداناتىنىن جاريا ەتتى، دەپ حابارلايدى قازاقپارات ءتىلشىسى.

«تۇرعىنداردىڭ سەنىم دەڭگەيىن ارتتىرۋ ءبىزدىڭ قىزمەتكە كەلىپ ءتۇسىپ جاتقان وتىنىشتەردىڭ ۇدايى ارتىپ كەلە جاتقانىنان كورىنەدى. مىسالى، 2016 -جىلى سىبايلاس جەمقورلىققا قارسى قىزمەتكە 18 مىڭنان استام ءوتىنىش، 2017 -جىلى - 20 مىڭنان استام ءوتىنىش، 2018 -جىلى - 22 مىڭنان استام ءوتىنىش كەلىپ تۇسكەن. بۇل تۇرعىدا اعىمداعى جىلدىڭ 1-توقسانىندا دا از بولعان جوق. ورتالىق اپپاراتقا كەلىپ تۇسەتىن وتىنىشتەردىڭ ەڭ كوپ سانى نۇر- سۇلتان جانە الماتى قالالارىنىڭ تۇرعىندارىنان، ال باتىس قازاقستان، پاۆلودار جانە اتىراۋ وبلىستارى بويىنشا دەپارتامەنتتەردە ولاردىڭ ەڭ از سانى تىركەلىپ، ءتيىستى شەشىمدەر قابىلداندى. شاعىمداردىڭ كوپ سانى سۋبەكتىلىك قۇرامى بويىنشا جەرگىلىكتى اتقارۋشى، سوت ورگاندارىنىڭ، ىشكى ىستەر ورگاندارىنىڭ اتىنا كەلىپ تۇسۋدە» ، - دەدى اگەنتتىكتىڭ اكىمشىلىك- قۇقىقتىق دەپارتامەنتى قۇجات اينالىمى باسقارماسىنىڭ باسشىسى قۋانىش مىرزاعالي.

ونىڭ سوزىنە قاراعاندا، اكىمدىك قىزمەتكەرلەرىنە قاتىستى  1234 ءوتىنىش كەلىپ ءتۇستى. ونىڭ 67 پايىزى سىبايلاس جەمقورلىق فاكتىلەرى تۋرالى، 30 پايىزى قابىلدانعان شەشىمدەرمەن كەلىسپەۋشىلىك جانە 3 پايىزى ادەپ نورمالارىن بۇزۋشىلىقتار تۋرالى.

«ىشكى ىستەر ورگاندارىنىڭ قىزمەتكەرلەرىنە قاتىستى  1105 ءوتىنىش كەلىپ ءتۇستى، ولاردىڭ 41 پايىزى سىبايلاس جەمقورلىق تۋرالى، 56 پايىزى شەشىمدەرمەن كەلىسپەۋ جانە 3 پايىزى ادەپ بۇزۋشىلىقتار جايىندا. سوت ورگاندارىنا قاتىستى وتىنىشتەر سانى 2 ەسەگە ءوسىپ، 324 ءوتىنىشتى قۇراپ وتىر. ونىڭ 35 پايىزى سىبايلاس جەمقورلىق تۋرالى، 65 پايىزى قابىلدانعان شەشىمدەرمەن كەلىسپەۋ تۋرالى» ، - دەپ ناقتالادى باسقارما باسشىسى.

بەلگىلى بولعانداي، سالالار بولىنىسىندە كەلىپ تۇسكەن وتىنىشتەردىڭ ەڭ كوپ سانى ءبىلىم بەرۋ، قۇرىلىس جانە تۇرعىن- ءۇي كوممۋنالدىق شارۋاشىلىعى، سونداي- اق جەر قاتىناستارى سالالارىنا قاتىستى.

«ءبىلىم بەرۋ سالاسىنداعى شاعىمدار كولەمى 17 پايىزعا وسكەن، ونىڭ 74 پايىزى سىبايلاس جەمقورلىق فاكتىلەرى تۋرالى» ، - دەدى قۋانىش مىرزاعالي.