قازاقستاندىقتار ينتەرنەتتەن گورى تەلەارنالاردى كوپ كورەدى

نۇر-سۇلتان. قازاقپارات - قازاقستاندىقتار ينتەرنەتتەن گورى تەلەارنالاردى كوپ كورەدى.

بۇل جايىندا ەلوردادا ءوتىپ جاتقان Astana Media Week اياسىندا «Vi قازاقستان» كومپانياسىنىڭ باس ديرەكتورى يلمۋراد جۋمايەۆ ايتتى، دەپ حابارلايدى قازاقپارات ءتىلشىسى.

«تەلەۆيدەنيە قازاقستاندىق جارناما نارىعىنىڭ ماڭىزدى سەگمەنتى ەكەندىگى ءسوزسىز. ەگەر جالپى كولەمدە الىپ قارايتىن بولساق، تەلەۆيدەنيە – 55، ال ينتەرنتە 16 پايىزدى الىپ وتىر. تەك ينتەرنەت جايىندا كوبىرەك ايتىلىپ جاتادى. دەگەنمەن، تاياۋ ارالىقتا تەلەۆيدەنيە قامتۋى ۇلكەن مەديا بولىپ قالا بەرەدى. ياعني، ەگەر ءسىز تاۋارىڭىزدى نە قىزمەتىڭىزدى كوپ ادامعا جەتكىزگىڭىز كەلسە، وندا تەلەارنالارعا بالاما جوق»، - دەدى ول.

وسى رەتتە ول دالەل رەتىندە مەديا رەسۋرستاردى تۇتىنۋ ستاتيستيكاسىن العا تارتتى.

«ەگەر ينتەرنەتتى مەديا تۇتىنۋ جايىندا ءسوز قوزعار بولساق، قازاقستاندىقتار مەسسەندجەرلەردى قوسا العاندا ورتاشا ەسەپپەن 255 مينۋت جۇمسايدى. ازىرشە، تەلەديداردى كوپ كورەدى. شامامەن كۇنىنە 5 ساعات نەمەسە 272 مينۋت كورەدى. الايدا بۇل الشاقتىق قىسقارا تۇسۋدە»، - دەدى يلمۋراد جۋمايەۆ.

ايتا كەتەيىك، Astana Media Week شاراسىنىڭ ەكىنشى كۇنىندە قازاقستانداعى العاشقى - «ADTribune - ازيانىڭ جارنامالىق داۋىسى» اتتى جارنامالىق كونفەرەنسيا ءوتىپ جاتىر. وندا سالاداعى ماسەلەلەر، قيىندىقتار مەن ترەندتەر تۋرالى اشىق ايتىلۋدا. سونىمەن قاتار وسى كۇنى «TRENDZONE» كوممۋنيكاتيۆتىك الاڭىندا ىسكەرلىك كوممۋنيكاتسيالار بويىنشا اشىق سەمينار ۇيىمداستىرىلعان.