الماتىدا جالعا بەرىلەتىن پاتەرلەردى كىمدەر الا الادى؟
جاستارعا ارنالعان جاڭا پاتەرلەر الاتاۋ اۋدانىنا قاراستى كوككاينار جانە سايالى-2 ىقشام اۋداندارىنان بەرىلەدى. جوسپارعا سايكەس، ەڭ الدىمەن ءبىر بولمەلى 249 پاتەردىڭ كىلتى قازان ايىنىڭ سوڭىندا تابىستالادى.
«جۇمىس ىستەيتىن جاستارعا جالدامالى تۇرعىن ءۇي 5 جىلعا بەرىلەدى. وسى مەرزىم اياقتالعانان كەيىن پاتەردى بوساتۋ كەرەك. مەملەكەت ۇسىنىپ وتىرعان جەڭىلدىكتى جاستار ءوز پايداسىنا جاراتۋى كەرەك. ياعني، ولار ارزان باعاعا پاتەر جالدايدى جانە بەس جىلدا ءوز باسپاناسىنا قارجى جيناۋعا مۇمكىندىك الادى»، - دەيدى الماتى قالالىق تۇرعىن ءۇي ساياساتى باسقارما باستىعىنىڭ مىندەتىن اتقارۋشى ايبەك سايدىلدايەۆ.
جالعا پاتەر الۋ ءۇشىن ءوتىنىش بەرۋشىلەر جەرگىلىكتى جەردە تىركەۋدە بولۋى شارت (2 جىل). باسپاناسى بولماۋى ءتيىس. قۇجاتتار ەلەكتروندىق فورماتتا ەلەكتروندى سيفرلىق كىلت ارقىلى ۇسىنىلۋى كەرەك.
«ءوتىنىش بەرۋشى باسقارماعا مىناداي قۇجاتتاردى ۇسىنۋى كەرەك: ءوتىنىش، جەكە كۋالىگىنىڭ كوشىرمەسى، ديپلوم كوشىرمەسى (اتتەستات، كوللەدج، جوو ديپلومى) نەكە كۋالىگىنىڭ كوشىرمەسى، بالالارىنىڭ تۋۋ تۋرالى كۋالىگى، جىلجىمايتىن مۇلكى جوقتىعىن راستايتىن انىقتاما، جۇمىس ىستەيتىندىگىن راستايتىن جانە سوڭعى التى اي ىشىندەگى تابىسى كورسەتىلگەن انىقتاما قاجەت. كىرىسى 101 مىڭ تەڭگەدەن كەم بولماۋى - شارت. سونىمەن قاتار بانك شوتىنىڭ بولۋى ەسكەرىلەدى، ونداعى اقشانىڭ سومماسى ءارى قانشا جانە قالاي قارجى سالىناتىندىعى دا نازارعا الىنادى»، - دەپ اتاپ ءوتتى ايبەك سايدىلدايەۆ.
قۇجاتتاردى قابىلداۋ 23- قىركۇيەكتەن باستالىپ، 6- قازانعا دەيىن جالعاسادى. 7-12- قازان ارالىعىندا قۇجاتتار تەكسەرىلەدى. 15- قازان كۇنى باعدارلاماعا قاتىسۋشىلاردىڭ ءتىزىمى جاريالانادى. 16-22- قازان ارالىعىندا 5 جىل مەرزىمگە بەرىلەتىن پاتەرلەردىڭ كەلىسىمشارتى جاسالادى. سودان كەيىن پاتەرلەر بەرىلە باستايدى.
ءوتىنىش بەرۋشىلەردىڭ قۇجاتتارى بەس جۇمىس كۇنى ىشىندە تەكسەرىلۋى كەرەك. قۇجاتتار تولىق بولماي قالعان جاعدايدا تاعى ءبىر كۇن قوسىلادى. سودان كەيىن ون جۇمىس كۇنى ىشىندە اكىمدىك ۇپايلاردى ەسەپتەپ، ۇمىتكەرلەردىڭ ءتىزىمىن جاسايدى.