داۋرەن ابايەۆ شەتەلدىك پروديۋسەرلەرگە بىرلەسىپ سەريال ءتۇسىرۋدى ۇسىندى

نۇر- سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ شەتەلدىك پروديۋسەرلەر مەن تەلەارنا وكىلدەرىنە بىرلەسە سەريال ءتۇسىرۋدى ۇسىندى، دەپ حابارلايدى قازاقپارات ءتىلشىسى.

«مەن رەسەيدەن، قىتايدان، پولشا مەن ءۇندىستاننان كەلگەن ارىپتەستەرىمە رەسمي تۇردە ايتارىم - ءبىز بىرلەسكەن جوبا جاساۋعا دايىنبىز. ارنايى قاراجات ءبولىپ، جەكە ءارى ساپالى ءونىم دايىنداۋعا ءازىرمىز. ول ءونىمدى قازاقستاندا دا، شەتەلدە دە تۇسىنىكتى بولاتىنداي شىعارۋعا بولادى. ەگەر سىزدەردىڭ تاراپتارىڭىزدان قانداي دا ءبىر ۇسىنىس بولسا - مارحابات. ءبىراق، ەگەر ءبىز سەرىكتەسە جۇمىس ىستەسەك، ول ەلدىڭ تەلەارناسىمەن ءبىزدىڭ ەلدىڭ تەلەارناسى بىرلەسە جۇمىس جۇرگىزگەن ءجون بولار ەدى. 2020 -جىلى بىرلەسكەن جوبا ازىرلەيىك. ءبىز كەلەسى جىلدىڭ اياعىندا 2 ميلليون دوللاردان ارتىق قاراجات تاپتى دەپ ماقتانا ايتىپ وتىراتىنداي (كۇلدى) سول بىرلەسكەن ءونىمدى شىعارايىق» ، - دەدى داۋرەن ابايەۆ ەلوردادا ءوتىپ جاتقان Astana Media Week شاراسىندا.

ايتا كەتەرلىگى، بۇگىنگى شاراعا پولشا، ءۇندىستان، رەسەي مەن قىتاي ەلدەرىنەن پروديۋسەرلەر مەن رەجيسسەرلەر كەلگەن بولاتىن.

ەسكە سالا كەتسەك، ەلورداداعى «قازمەديا» ورتالىعىندا ءۇش كۇنگە سوزىلاتىن ورتالىق ازياداعى ەڭ ءىرى مەديا- وقيعا — Astana Media Week ءوتىپ جاتىر. Astana Media Week- ءتىڭ ءبىرىنشى كۇنى سەريالدىق ونىمدەردى ازىرلەۋ جانە شىعارۋ تاقىرىبىمەن جانە سالىق پرەفەرەنتسيالارى، كينو پروكاتىنىڭ شارتتارى، مازمۇنى، فيلم ءونىمىنىڭ شىعارماشىلىق دەڭگەيى جانە ونىڭ دەمەۋشىلەر ءۇشىن تارتىمدىلىعى تاقىرىبىمەن ەرەكشەلەنەدى.