كيىك اۋلاۋعا قاتىستى جەكە قىلمىستىق باپ ەنگىزىلۋى مۇمكىن

نۇر-سۇلتان. قازاقپارات - قىلمىستىق زاڭناماعا كيىك اۋلاۋعا قاتىستى جەكە باپ ەنۋى مۇمكىن. بۇل تۋرالى ق ر باس پروكۋرورىنىڭ ورىنباسارى مارات احمەتجانوۆ ايتتى.

«باركونەرلىك قىلمىستىڭ بارلىق قۇرامى بويىنشا براكونەردىڭ قارۋى مەن كولىگىن، مۇلكىن تاركىلەۋ شاراسى ەنگىزىلەدى. زاڭسىز اڭشىلىق، زاڭسىز بالىق اۋلاۋ «تەرىس قىلىق» ساناتىنان «ورتاشا اۋىر قىلمىس» ساناتىنا كوشىرىلۋى ءتيىس. ءتىپتى جالعىز رەت براكونەرلىك جاساعاندار تابيعاتقا شىعىن كەلتىرمەدى دەگەن كۇننىڭ وزىندە، قىزىل كىتاپتاعى جانۋارلار زارداپ شەكپەسە دە باس بوستاندىعىنان ايرىلۋى مۇمكىن. قولدانىستاعى زاڭنامادا مۇنداي قىلمىس ءۇشىن 40 تاۋلىككە قاماۋ شاراسى قاراستىرىلعان»، - دەگەن باس پروكۋراتۋرا وكىلى قورىقشىعا قول كوتەرۋ پوليتسيا قىزمەتكەرىنە شابۋىل جاساۋ قىلمىسىمەن تەڭەستىرىلۋ كەرەكتىگىن ايتتى.

«جۇيەلى تۇردە باركونەرلىكپەن اينالىسۋدىڭ جاۋاپكەرشىلىگى كۇشەيتىلەدى. سيرەك كەزدەسەتىن اڭدار مەن بالىقتار اۋلاۋ «اۋىر قىلمىس» ساتناتىنا وتەدى. ياعني، 6 جىلعا دەيىن باس بوستاندىعىنان ايىرۋ جازاسى قاراستىرىلعان. ۇيىمداسقان قىلمىستىق توپ قۇرامىندا براكونەرلىك جاساعانى ءۇشىن 10 جىلعا دەيىن باس بوستاندىعىنان ايىرۋ كوزدەلگەن. زاڭسىز كيىك اۋلاۋ جانە قىرۋ، ءمۇيىز ساۋداسى ءۇشىن جەكە قىلمىستىق قۇرام قاراستىرىلماق. ال مەملەكەتتىك ينسپەكتورعا كۇش قولدانۋ، ومىرىنە قول سۇعۋ ارەكەتى قۇقىق قورعاۋ قىزمەتكەرىنە شابۋىل جاساۋ ارەكەتىمەن تەڭەستىرىلەدى»، - دەدى مارات احمەتجانوۆ.