كينوتەاترداعى وتاندىق كينولار گولليۆۋد فيلمدەرىن قۋىپ جەتتى - نۇرلان قويانبايەۆ

None
None
نۇر-سۇلتان. قازاقپارات - قازاقستاندىق كينوپروديۋسەر نۇرلان قويانبايەۆ Astana Media Week اپتالىعىندا قازاقستاندىق كينوتۋىندىلاردى كورسەتۋ جونىندە باياندادى، دەپ حابارلايدى قازاقپارات ءتىلشىسى.

«كينو سالاسىندا جۇمىس ىستەپ جاتقانىمىزعا 4 جىل بولعان جوق، بۇل ارالىقتا كىشىگىرىم 3 كينو تۇسىردىك. قازاقستاندىق كورەرمەننىڭ وتاندىق كينوعا دەگەن قىزىعۋشىلىعى ءوسىپ جاتىر. سوڭعى ەكى جىلدا قازاقستاندىق كينولار كورۋ جاعىنان گولليۆۋد كينولارىن قۋىپ جەتتى دەپ ايتۋعا بولادى. قازاقستان كينوتەاترلارىنان كورسەتىلگەن ۇزدىك 5 كينونىڭ قاتارىنا 2 قازاقستاندىق كينو ەندى. «بيزنەس پو كازاحسكي» فيلمىنىڭ كاسسالىق ءتۇسىمى 2 ميلليون دوللار تابىس تاپتى. ونى ەڭ ۇزدىك دەپ وتىرعان جوقپىن. ءبىراق، بۇل - كينوتەاتر تۇسىمىندەگى قازاقستاندىق كينونىڭ جەڭىسى»، - دەدى ن. قويانبايەۆ «قازاقستانداعى كينو مەن سەريالدى دامىتۋ» پانەلدىك سەسسياسىندا.

سونىمەن بىرگە، پروديۋسەر ۇكىمەت تاراپىنان ونەر مەن كينونى قولداۋدىڭ ماڭىزدىلىعىن اتاپ ءوتتى.

«بيزنەس پو كازاحسكي» فيلمىنىڭ كەزەكتى شىعارىلىمىن كورەيادا ءتۇسىرىپ كەلدىك. ونداعى ارىپتەستەرمەن سويلەسكەندە، كورەيا مەملەكەتى ءالى كۇنگە دەيىن جەكە كومپانيالارعا كومەكتەسىپ جاتقانىن ايتتى. ناتيجەسىن دە كورىپ وتىرسىزدار، وڭتۇستىك كورەيانىڭ تەلەحيكاياسى، كينوسى، مادەنيەتى بۇكىل الەمگە تارالدى»، - دەدى ول.

ايتا كەتەيىك، ەلورداداعى «قازمەديا» ورتالىعىندا ءۇش كۇنگە سوزىلاتىن ورتالىق ازياداعى ەڭ ءىرى مەديا- وقيعا - Astana Media Week باستالدى.

وندا اقپارات جانە قوعامدىق دامۋ ءمينيسترى داۋرەن ابايەۆ وتاندىق سەريال وندىرۋشىلەرگە سالىق جەڭىلدىگى تۋرالى ايتتى.

اۆتور: ايجان سەرىكجان قىزى

سوڭعى جاڭالىقتار