قازاقستان پرەزيدەنتى ق ك پ وك ساياسي بيۋروسىنىڭ مۇشەسى ياڭ جەچيمەن كەزدەستى
كەزدەسۋ بارىسىندا مەملەكەت باسشىسى ياڭ جەچي مىرزانى بۇرىننان بىلەتىنىن، ونىڭ ق ك پ سىرتقى ىستەر ءمينيسترى لاۋازىمىنداعى تابىستى قىزمەتىمەن بۇعان دەيىن دە ءجىتى تانىس ەكەنىن اتاپ ءوتتى. پرەزيدەنت بۇل ساپاردىڭ قازاقستان ءۇشىن وتە ماڭىزدى ەكەنىن دە ايتتى.
- ءبىز قىتايدى كورشىلەس ءارى دوستىق قارىم- قاتىناستاعى مەملەكەت دەپ ەسەپتەيمىز. سونداي- اق، الەمدەگى ەكونوميكاسى دامىعان ەكىنشى ەل ەكەنىن دە نەگىزگە الامىز. قازاقستان بۇل ساپارعا ۇلكەن ءمان بەرەدى. ءبىز قازاقستاننىڭ ازياداعى ءىس- قيمىل جانە ءوزارا سەنىم شارالارى جونىندەگى كەڭەس پەن حالىقارالىق ارەناداعى باسقا دا باستامالارىن قولداعانى ءۇشىن قىتاي مەملەكەتىنە ريزاشىلىق بىلدىرەمىز. ەكونوميكالىق ىنتىماقتاستىققا كەلەر بولساق، ونىڭ ستراتەگيالىق سيپاتى بار. تۇڭعىش پرەزيدەنتىمىز نۇرسۇلتان نازاربايەۆ پەن ءتوراعا شي جينپيڭ قول جەتكىزگەن ۋاعدالاستىقتار ودان ءارى دامي بەرەدى، - دەدى مەملەكەت باسشىسى.
ياڭ جەچي قاسىم-جومارت توقايەۆتى بيىلعى ماۋسىمدا قازاقستان پرەزيدەنتى لاۋازىمىنا سايلانۋىمەن قۇتتىقتادى. ونىڭ ايتۋىنشا، سايلاۋداعى جەڭىس - قازاقستان حالقىنىڭ جوعارى سەنىمىنىڭ كورسەتكىشى. ياڭ جەچي قازاقستان پرەزيدەنتىنىڭ بۇل ساپارى ەكى ەل اراسىنداعى جان-جاقتى ستراتەگيالىق سەرىكتەستىككە تىڭ سەرپىن بەرەتىنىن ءمالىم ەتتى.
