قىتايدىڭ ەڭ باي ادامى دجەك ما قازاقستان جايلى نە ايتقان؟
الپاۋىت كومپانيانىڭ نەگىزىن قالاعان ول ءبىزدىڭ ەلگە بىرنەشە رەت كەلگەن.
بۇگىن ءبىز تابىستى كاسىپكەردىڭ ەلىمىزگە قاتىستى ايتقان ويلارىن ۇسىنامىز.
قازاقستانعا نە جەتىسپەيدى؟
2016 -جىلى دجەك ما ەلوردامىزدا e-commerce ماماندارىمەن كەزدەسۋ وتكىزگەن بولاتىن. وندا قىتايلىق كاسىپكەر ءىسىن جاڭا باستاعان بيزنەسمەن، ستارتاپەرلەرگە جانە كومپانيالاردىڭ توپ- مەنەدجەرلەرىنە كاسىپورىندى دۇرىس قۇرۋدىڭ امالدارىن، قىزمەتكەرلەرمەن جۇمىس جانە قانداي ماقساتتارعا ۇمتىلۋ كەرەكتىگىن ايتىپ، باعىت-باعدار بەرگەن.
سونىمەن قاتار، قازاقستانعا نە جەتىسپەيتىنىن، قاي باعىتتا دامۋ كەرەكتىگى تۋرالى وي قوزعاعان. «قازاقستانعا قاتىستى كوپ نارسە بىلمەسەم دە، بيزنەس جۇرگىزۋدەگى تاجىريبەمە سۇيەنە وتىرىپ، مۇناي ءوندىرۋ سالاسى جاقسى ەلدە ءىرى كومپانيالار كوپ بولاتىنىن بىلەمىن. مەنىڭ قازاقستانعا بەرەر كەڭەسىم: شاعىن كومپانيالار كوپ بولۋى كەرەك. سەرۆيستىك يندۋستريا دامىسىن، ەكونوميكا نەعۇرلىم سەرپىندى بولسىن دەسەك، وندا شاعىن كاسىپورىنداردى كوبەيتۋ كەرەك. ال ول ءۇشىن كاسىپكەرلەر سانىن ارتتىرۋ قاجەت. جاستاردى شابىتتاندىرۋ، ولارعا ءبىلىم بەرۋ ماڭىزدى. باستاماشىل ادامدى شابىتتاندىرىڭىز. ارماندارىڭىزدى جۇزەگە اسىرىڭىز، 30 جاسقا كەلگەندە ءوز ىسىڭمەن اينالىسساڭ، بۇل ءوزىڭىز ءۇشىن دە، ەل ءۇشىن دە جاقسى»، - دەدى كاسىپكەر.
بەلگىلى كاسىپكەر سول جىلى قازاقستاندا قىزمەت كورسەتۋ سالاسى دامىماعانىن ايتقان. «بۇل ەلدىڭ الەۋەتى زور. مەنىڭ بىلۋىمشە، قازاقستاندا تاۋ- كەن ونەركاسىبى، مۇناي جانە اۋىل شارۋاشىلىعى بار، ءبىراق قىزمەت كورسەتۋ جاعى جوق. ناقتىراق ايتقاندا قىزمەت كورسەتۋ يندۋسترياسى. 20 جىل بۇرىن ينتەرنەت بولماعان كەزدە ءوندىرىس پەن وڭدەۋ ءۇشىن كونۆەيەر، جاقسى ماشينالار مەن كوپ اقشا قاجەت بولعان. ءبىراق قازىر ينتەرنەت زامانىندا تابىسقا جەتۋ وتە وڭاي»، - دەگەن دجەك ما.
بيزنەستىڭ قىر-سىرى جايلى اقىلى
دجەك مانىڭ ايتۋىنشا، ورتا تاپ كۇشتى بولسا، ەل زاماناۋي، ساۋ، تۇراقتى بولادى. «كاسىپكەرلىك، شاعىن بيزنەس جانە قىزمەت كورسەتۋ سالاسى ميلليونداعان ورتا تاپتاعى ادامداردى قالىپتاستىرا الادى»، - دەگەن ول.
ونىڭ ايتۋىنشا، تابىس كەپىلى بيزنەس- جوسپاردى ۇستانباۋدا جاتىر. جۇزدەگەن، مىڭداعان ادام ەشكىمگە قاجەت ەمەس، وزدەرى دە وقىمايتىن بيزنەس- جوسپار جازا الادى. الايدا، كوپ جاعدايدا ولار جۇمىس ىستەمەي جاتادى.
«تەك ءبىر پرينسيپ جۇمىس ىستەيدى: كليەنت ساعان ريزا بولىپ كۇلىمسىرەپ ۇيگە قايتادى نەمەسە سەنى جەككورىپ، قارعىس ايتىپ، ەسىكتى تەۋىپ شىعادى. ەكىنشى جاعدايدا كوپ اقشا تاۋىپ تۇرساڭىز دا، ءبارى پايداسىز. بەدەلدى قالىپقا كەلتىرۋ ءۇشىن جىلدار كەتەدى»، - دەگەن كاسىپكەر.
قازاق مادەنيەتىنە قۇرمەتى
مۇنداي كەزدەسۋلەردەن بولەك، دجەك ما قازاقستاننىڭ مادەني ومىرىنە دە قىزىعۋشىلىق بىلدىرەتىنىن بايقاۋعا بولادى. مىسالى ول اباي قۇنانبايەۆتىڭ 175 جىلدىعى قۇرمەتىنە ارنالعان فلەشموبقا قاتىسىپ، ۇلى ويشىلدىڭ ولەڭىن قىتاي تىلىندە وقىپ، ۆيدەو جۇكتەگەن.
ەستافەتانى قازاقستان رەسپۋبليكاسىنىڭ ق ح ر- داعى ەلشىسى شاحرات نۇرىشەۆتەن قابىلداپ، بوكسشى گەننادي گولوۆكينگە جولداعان. وعان قوسا، قىتايدىڭ ەڭ باي ادامى دجەك ما قازاقستاندىق ءانشى ديماش قۇدايبەرگەنگە سىيلىق بەرگەن. قازاقستاندىق ءانشى بۇل تۋرالى Instagram جەلىسىندەگى پاراقشاسىندا جازعان. الايدا ديماش قانداي سىيلىق العانىن ناقتىلامادى. ول تەك كىتاپقا ۇقساس قارا قوراپتىڭ سۋرەتىن جاريالادى.
ايتا كەتەلىك، دجەك ما الەمگە بەلگىلى Forbes جۋرنالىنىڭ مۇقاباسىنا شىققان العاشقى قىتايلىق كاسىپكەر. 2018 -جىلدىڭ قاراشا ايىنىڭ سوڭىنداعى جاعداي بويىنشا Forbes كاسىپكەردىڭ بايلىعىن 35,8 ميلليارد دوللارعا باعالاعان. ول سىلايشا دجەك ما الەمدەگى ەڭ باي ادامداردىڭ قاتارىندا 21-ورىندا تۇر.
Tengrinews.kz
2019 -جىل