ماقپال ءجۇنىسوۆا جاس جۇبايلاردىڭ ءدام-تۇزىنىڭ جاراسپاۋ سەبەبىن ايتتى
ءانشىنىڭ پىكىرىنشە، جاستار جالقاۋ، ال جۇبايلاردىڭ اراسىنداعى ۇرىس- كەرىسكە اتا- انا سەبەپشى ەكەن، دەپ حابارلايدى oinet.kz ءتىلشىسى 31-ارناعا سىلتەمە جاساپ.
«قازىر كوبىنەسە ەستىپ جاتامىز، قىز بارعان جەرىندە جىگىتتىڭ اناسىمەن ءتىل تابىسا الماي جاتادى. كوپ ۇيىقتاپ ۇيرەنگەن قازىرگى جاستار. ەڭبەككە باۋلىماعان، سونىڭ كەسىرىنەن دەپ ويلايمىن»، - دەيدى ءانشى.
ءانشى بۇرىنعى زامان مەن قازىرگى عاسىردىڭ زامانىن سالىستىرا وتىرىپ، ايىرماشىلىق اتا-انانىڭ بەرگەن تاربيەسىندە دەپ قورىتىندىلادى.
«ءبىزدىڭ زاماننىڭ جاستارىن اتا-اناسى ەرتە تۇرعىزىپ، ءۇيدىڭ تىرلىگىنە، دالانىڭ تىرلىگىنە بارلىعىنا ۇيرەتكەن عوي. «ەڭبەك ەتسەڭ ەرىنبەي، تويادى قارنىڭ تىلەنبەي» دەگەن سياقتى. سونداي ەڭبەكپەن وسكەننەن كەيىن، سول زاماندا تۇسكەن كەلىن دە تاڭەرتەڭ ەرتە تۇرۋدان جالىقپايتىن، كۇنى بويى ءۇيدىڭ تىرلىگىن جاساپ، بالاسىن دا تۋىپ ۇلگەرىپ، وعان قاراپ ۇلگەرىپ، اتا-ەنەسىنىڭ جاعدايىن جاسايتىن ءبىزدىڭ كەزدە»، - دەدى جاس كەزىندەگى زامانىن ەسكە العان ءانشى.
ماقپال ءجۇنىسوۆا قازىرگى زاماندا قاتىگەزدىك كوپ ەكەنىن ايتىپ ءوتتى. سونداي-اق ەكى جاستىڭ ءدام-تۇزىنىڭ جاراسپاۋىنا اتا-انانى دا كىنالايدى.
«ەنەسى قاتتى ءسوز ايتسا، سونى كوتەرە الماي قالادى. كىم كىنالى؟ اتا-انانىڭ ءوزى كىنالى. اتا-انا «قىزىم-اۋ، سەنىڭ بارار جەرىڭ باسقا، ەرتەڭ بارعان جەرىندە ەرتە تۇرىپ، اتا-ەنەڭنىڭ جاعدايىن جاساپ، كۇيەۋىڭنىڭ جاعدايىن جاساماساڭ قايتىپ ورالاسىڭ» دەپ وسى كۇننەن باستاپ قىزدى سولاي تاربيەلەۋ كەرەك»، - دەيدى ماقپال ءجۇنىسوۆا.