16:30, 10 - قىركۇيەك 2019 | GMT +6
ەلورداداعى ءبىلىم باسقارماسىنىڭ باسشىسى نەگە ەدەن جۋىپ ءجۇر
نۇر-سۇلتان. قازاقپارات - ەل استاناسىنداعى ءبىلىم باسقارماسىنىڭ باسشىسى ءانۋار جانعوزين وقۋشىلارعا ۇلگى كورسەتۋ ءۇشىن ءوزىنىڭ فەيسبۋك پاراقشاسىندا ءوز كابينەتىندە قالاي ەدەن جۋعانىن ايتىپ بەردى.
#وزىڭنەنباستا ەستافەتاسىن باستاعان جانعوزين بۇل جۇمىسقا نەبارى 15 مينۋت قانا ۋاقىتتىڭ كەتەتىنىن ايتا وتىرىپ، قالالىق ارىپتەستەرىن دە تەحنيكالىق قىزمەتشىلەرگە كومەكتەسۋگە شاقىردى. بۇل ارەكەتىمەن ول وقۋشىلاردىڭ وقۋ ورىندارىن تازالاۋىن قولدايتىنىن ءبىلدىردى.
«بۇل ءار وقۋشى ەدەن جۋسىن دەگەن ءسوز ەمەس. بۇل باستاما بالالارعا وزگەنىڭ جۇمىسىنا قۇرمەتپەن قاراۋدى، قورشاعان ورتانى تازا ۇستاپ، ايالاۋعا ۇيرەتۋ ءۇشىن جاسالۋدا. ارينە، اركىمنىڭ ءوز ەركىمەن»، - دەيدى ءبىلىم باسقارماسىنىڭ باسشىسى.