ۇلان-باتىردا ساداق اتۋدان حالىقارالىق تۋرنير ءوتتى

نۇر-سۇلتان. قازاقپارات - ساداق اتۋدان 1- حالىقارالىق تۋرنير موڭعوليا استاناسى ۇلان-باتىر قالاسىندا ۇيىمداستىرىلدى، دەپ حابارلايدى قازاقپارات ءتىلشىسى.

ق ر ۇلتتىق سپورت قاۋىمداستىعى حابارلاعانداي، قىركۇيەكتىڭ 5-9- كۇندەرى وتكەن بۇل جارىستا 27 مەملەكەتتەن الپىسقا جۋىق مەرگەن باق سىنادى.

مەرگەندىك سايىسىنان موڭعوليادا ۇيىمداستىرىلعان 1- حالىقارالىق تۋرنير «ازيا ءستيلى»، «كورەي ءستيلى»، «ەۋروپا ءستيلى» جانە موڭعوليا ءداستۇرلى ساداق اتۋ ءستيلى بويىنشا ءوتتى. قارشاداي بالاسىنان قاجىرلى قارياسىنا دەيىن ۇلتتىق ساداق اتۋدى ەجەلدەن ماشىق قىلاتىن مونعوليا ەلىنىڭ مەرگەندەرى ءوز استانالارىندا وتكەن 1- حالىقارالىق تۋرنيردىڭ جۇلدەلى ورىندارىن تالاسسىز يەلەندى.

ءتىپتى، ات ۇستىنەن ساداق اتۋدان الەم چەمپيوناتىنىڭ بىرنەشە دۇركىن جەڭىمپازى، ماجارستاندىق ايگىلى مەرگەن كريستوف ارپاتتىڭ وزىنە بۇل تۋرنيردە ءتورتىنشى ورىندى قاناعات تۇتۋعا تۋرا كەلدى.

مونعوليا مەملەكەتى ۇيىمداستىرعان 1- حالىقارالىق تۋرنيرگە قاتىسۋشى 27 مەملەكەت قاتارىندا اقش، ساۋد ارابياسى، قىتاي، رەسەي، گەرمانيا، كانادا، تايلاند، اۋستراليا، فينليانديا سياقتى ءداستۇرلى ساداق اتۋ سپورتى دامىعان ەلدەر بار.

بۇل جارىسقا ءبىزدىڭ ەلدەن حالىقارالىق جارىستاردىڭ جۇلدەگەرى، جۋىردا ات ۇستىنەن ساداق اتۋدان وڭتۇستىك كورەيادا وتكەن ⅩⅤ الەم چەمپيوناتىندا جۇلدەگەر اتانعان سۇرمەرگەن ەلدوس باداشيەۆ قاتىسىپ قايتتى.

ەسكە سالىپ وتەيىك، بيىل ءبىزدىڭ ءداستۇرلى ساداق اتۋشى سپورتشىلارىمىز ماجارستاندا وتكەن الەم كۋبوگىندا، وڭتۇستىك كورەيادا وتكەن الەم چەمپيوناتىندا، تۇركيادا وتكەن دۇنيەجۇزىلىك جارىستا باق سىنادى.

اۆتور: كۇنسۇلتان وتارباي