ماكسيم سپوتكاي: قازاققا العىس ايتقىڭ كەلسە، قازاقشا سويلە

None
None
نۇر-سۇلتان. قازاقپارات - قازاقستان حالقى اسسامبلەياسىنىڭ جانىنداعى «جاڭعىرۋ جولى» رەسپۋبليكالىق جاستار قوزعالىسىنىڭ ءتوراعاسى ماكسيم سپوتكاي لاتىن الىپبيىنە ورالۋ - ءتىل بۇزار بوگدە ەرەجەلەردىڭ ىقپالىنان قۇتىلۋ ءۇشىن قاجەت دەگەن پىكىردە.

بۇل تۋرالى لاتىن الىپبيىنە ارنالعان جالپى ۇلتتىق ديكتانت بارىسىندا ايتتى، دەپ حابارلايدى قازاقپارات ءتىلشىسى.

«قازاق ءتىلىن قولداۋ، قازاق ءتىلىن ودان ءارى نىعايتۋ -  ءسوزسىز، «جاڭعىرۋ جولى» رەسپۋبليكالىق جاستار قوزعالىسىنىڭ ەڭ ماڭىزدى ماقساتتارىنىڭ ءبىرى. قازىرگى تاڭدا جاستار اراسىندا «مەن قازاقشا نە ءۇشىن سويلەۋىم كەرەك» دەگەن سۇراق تۋىنداپ ءجۇر. سونداي سۇراق قويۋشىلارعا ءوز پىكىرىمدى جەتكىزگىم كەلەدى. اشىعىن ايتۋ كەرەك، قازاق ەلىنە، قازاق جەرىنە كەلگەن اتا-بابالارىمىزدىڭ ءومىرىن ساقتاپ قالعان قيىن-قىستاۋ زاماندا باۋىر بولعان قازاققا شىن نيەتپەن العىس ايتۋ -  بۇل قۇر سوزبەن ەمەس، ناقتى ىسپەن بولۋى كەرەك. قازاققا العىس ايتۋ -  قازاق تىلىندە ەركىن سويلەۋ دەپ قابىلداۋىمىز كەرەك. «قازاققا شىنىمەن ريزا بولساڭ، قازاقشا سويلە» دەگەن ۇستانىم بارىمىزگە ۇران، ومىرلىك قاعيدا بولۋى ءتيىس. ءبىزدىڭ قوزعالىس وسى باعىت بويىنشا جۇمىس ىستەپ جاتىر»، - دەگەن جاستار قوزعالىسىنىڭ باسشىسى لاتىن گرافيكاسىنا ورالۋ تىلدىك رەفورمانىڭ باستاۋى دەگەن وي ايتتى.

«ءدال قازىرگى تاريحي ساتتە قوعامدا كەلىسىمدى نىعايتۋ پروتسەسىن باسقا دەڭگەيگە شىعاراتىن ۋاقىت كەلدى. ول دەڭگەي مەملەكەتتىك تىلمەن تىكەلەي بايلانىستى. پرەزيدەنت قاسىم-جومارت توقايەۆ تا قازاق ءتىلى مەملەكەتتى ءتىل عانا بولىپ قالماي، ۇلتارالىق قاتىناس ءتىلى بولۋى كەرەكتىگىن ءوز جولداۋىندا ايتتى. لاتىن الىپبيىنە ورالۋ پروتسەسىنىڭ نەگىزگى ماقساتى ءبىر ارىپتەردىڭ ورنىنا باسقا ارىپتەردى اكەلۋ عانا دەپ ويلاماۋىمىز كەرەك. مۇنداعى ەڭ باستى ماقسات - ءتىل بۇزار ورىس ءتىلى ەرەجەسىنىڭ ىقپالىنان قۇتىلۋ. بۇل تىلدىك رەفورمانى ءدال وسىلاي قابىلداۋىمىز كەرەك. ياعني، بۇل قاراپايىم ترانسليتەراتسيا ەمەس، بۇل تولىق ماعىناداعى اۋقىمدى رەفورما»، - دەدى قوعام بەلسەندىسى.

سوڭعى جاڭالىقتار