وقۋشىلاردىڭ سىنىپ تازالاۋى: ەلوردا ءبىلىم باسقارماسى تۇسىنىكتەمە بەردى
«سوڭعى كۇندەرى ەلوردالىق مەكتەپتەردە بىلتىردان باستاپ ورىن العان باستاماعا قاتىستى كوپتەگەن پىكىرتالاستار تۋىنداۋدا»، - دەپ جازدى قالالىق ءبىلىم باسقارماسىنىڭ باسشىسى ءانۋار جانعوزين ءوزىنىڭ Facebook پاراقشاسىندا.
بۇل - وقۋشىلارعا مەكتەپ عيماراتىن تازالاۋ كەزىندە تەحنيكالىق قىزمەتكەرلەرگە كومەك كورسەتۋىنە بايلانىستى كوتەرىلگەن ماسەلە.
«جالپى، بۇل ءار وقۋشى ەدەن جۋۋ كەرەك دەگەن ءسوز ەمەس، وسىنى بىردەن اتاپ وتكىم كەلەدى. باستاما اسحانادا ىدىستارىن جۋاتىن جەرگە اپارۋ نەمەسە ساباقتان كەيىن جۇمىس ورنىن تازا ۇستاۋ، كەيبىر جاعدايدا سىنىپتار مەن دالىزدەردى جيناۋعا كومەكتەسۋ سياقتى جۇمىستار. بۇل ءبىزدىڭ بالالارىمىزدىڭ بويىندا باسقا ادامداردىڭ ەڭبەگىن قۇرمەتتەۋ جانە قورشاعان ورتاعا كۇتىممەن قاراۋ داعدىلارىن دامىتۋ ءۇشىن جاسالادى»، - دەپ اتاپ وتكەن ءانۋار جانعوزين.
ونىڭ ايتۋىنشا، وقۋشىلاردىڭ سىنىپ تازالاۋ تاجىريبەسى ولاردىڭ قالاۋى بويىنشا جۇرگىزىلەدى.
سونداي-اق، ءبىلىم باسقارماسىنىڭ باسشىسى ۇلگى رەتىندە ءوز كابينەتىن تازالاپ، جاڭا ەستافەتانى باستادى.
«تەك سىرتتان باقىلاۋشى ءرولىن اتقارماس ءۇشىن، مەن بۇگىننەن باستاپ ءار كەش سايىن ءوز كابينەتىمدى تازالاۋ ارقىلى تەحنيكالىق قىزمەتشىلەردىڭ جۇمىسىن جەڭىلدەتىپ، كومەكتەسۋ تۋرالى شەشىم قابىلدادىم. بۇعان بىلاي قاراعاندا 15-20 مينۋت قانا ۋاقىت كەتەدى»، - دەيدى ول.
ءسوز سوڭىندا ءا. جانعوزين #وزىڭنەن باستا تازالىق ەستافەتاسىن ەلوردالىق ءبىلىم بەرۋ ۇيىمدارىنىڭ باسشىلارىنا جولدادى.
ەسكە سالا كەتسەك، بۇعان دەيىن ەلىمىزدە وقۋشىلاردىڭ سىنىپ تازالاۋ تاجىريبەسىنىڭ قايتا ەنگىزىلەتىندىگى تۋرالى حابارلاعان بولاتىنبىز.