لەۆ تولستوي ومىرىنە قاتىستى قىزىقتى دەرەكتەر
ارينە، تولستوي سەكىلدى كلاسسيكتەردىڭ ءومىر جولى بارشاعا ءمالىم. ونى ءىش پىستىرار ادەبيەت حرەستوماتيالارىنان بولەك، ءتۇرلى باعدارلامالاردا دا ايتىپ وتىرادى. سول سەبەپتى، بيوگرافيالىق دەرەكتەردى تولىق بەرۋدىڭ ورنىنا، قىزىقتى بولار دەگەن تۇستارىنا توقتالىپ ءوتۋدى ءجون كوردىك. ونىڭ ۇستىنە نوبەل ماراپاتىنان باس تارتقان تولستويدىڭ عۇمىرى ونداي ساتتەردەن كەندە ەمەس.
► «اقشا - زۇلىمدىق باستاۋى» دەگەندى ءجيى ايتاتىن تولستوي ءوزىن نوبەل ماراپاتىنا ۇسىندى دەگەندى ەستىپ قاتتى ۋايىمداعان ەكەن. سودان فينليانديالىق جازۋشى ارۆيد يارنەفەلتكە: «الگى شۆەدتەرگە ماعان ماراپاتتى بەرۋشى بولماسىن دەپ ايت» دەگەن مازمۇندا حات جازىپتى. ماراپاتتى بۇل الماعانى بەلگىلى بولعان كەزدە شەكسىز قۋاندى دەسەدى.
► لەۆ تولستوي جاس كەزىندە قۇمار ويىندارعا ەسسىز اۋەس بولعان. ءبىر كۇنى ءوزىنىڭ كورشىسى گوروحوۆپەن كارتا ويناپ، ويىنعا سالعان ۇيدەن ايىرىلىپ قالادى. بۇل ءوزى تۋىپ- وسكەن شاڭىراق بولاتىن.
► تولستوي سوعىسقا قاتىسقان. كاۆكاز سوعىسى كەزىندە سيەۆاستوپول قورعانىسىندا بولعان. ەرلىگى ءۇشىن بىرنەشە وردەن، مەدالمەن ماراپاتتالعان.
► تولستوي ءوزىنىڭ بولاشاق ايەلى سوفيا اندرەيەۆنانىڭ اناسىمەن دوس بولادى دا، ونىڭ ءۇش قىزىنىڭ قايسىسىنا ۇيلەنەرىن بىلمەي، ءبىراز ۋاقىت تاڭداپ جۇرگەن. تولستويدىڭ جانۇياسىندا 13 بالا تۋىلعان. ونىڭ بەسەۋى ءسابي كەزىندە قايتىس بولادى. ايەلى وزىنەن 16 جاس كىشى بولعان. ياعني، ولار شاڭىراق كوتەرگەندە سوفيا 18 دە، گراف 34 تە ەدى.
► قارتايعان شاعىندا جازۋشى ءوز-وزىنە «جابىعۋ، بەيجايلىلىق» دەگەن دياگنوز قويىپ، ونى قىمىزبەن ەمدەۋ كەرەك دەگەن شەشىم قابىلدايدى. سونداي-اق، قاراپايىم حالىقتى جوعىن جوقتاپ، مۇڭىن مۇڭداعان لەۆ تولستوي ەگدە تارتقان شاعىندا جالاڭ اياق ءجۇرۋدى ادەتكە اينالدىرعان ەكەن.
► لەۆ نيكولايەۆيچ تولستوي ەت جەمەيتىن. ول ءومىرىنىڭ سوڭعى جىلىندا، ياعني 1910 -جىلى «سەكسەن جىلدان كەيىن بارلىق ادامدار ۆەگەتاريان بولادى، ولار ەت جەۋگە ادام جەگەن سەكىلدى جيىركەنىشپەن قارايدى» دەگەن ەكەن.
► تولستوي قارتايعان شاعىندا ايەلىمەن اجىراسىپ، ساياحاتقا اتتانادى. سول ساپارىندا، ناقتىراق ايتساق، 1910 -جىلدىڭ 7 -قاراشاسىندا استاپوۆو ستانسياسىندا كوز جۇمادى.