تۇركىستانداعى كۇلتوبە قالاشىعىنان التىن اشەكەيلەر تابىلدى

تۇركىستان. قازاقپارات -  تۇركىستانداعى كۇلتوبە قالاشىعىنان II- III عاسىرعا ءتان التىن اشەكەيلەر تابىلدى.

 زەرگەرلىك بۇيىمدار ەسكى قالاشىقتا جۇرگىزىلىپ جاتقان ارحەولوگيالىق قازبا جۇمىستارى كەزىندە انىقتالدى، دەپ حابارلايدى قازاقپارات ءتىلشىسى.

قوجا احمەت ياساۋي قورىق- مۋزەيى باسپا ءسوز قىزمەتىنىڭ مالىمەتىنشە، تابىلعان قازىنانىڭ ىشىندە سىرعالار مەن زەرگەرلىك بۇيىمداردىڭ بىرنەشە التىن بولشەكتەرى، ءتۇرلى مونشاقتار بار.

 ال كۇلتوبەدەگى حۋمدان پەشتىڭ ىشىندەگى قۇلاندى قىشتار اراسىنان اراب باسپاسىنان شىققان كولەمى 10*20 س م كىتاپ تابىلعان. كىتاپتىڭ ساقتالعان قالىڭدىعى - 1,2 س م. ارحەولوگتاردىڭ ايتۋىنشا، كىتاپتىڭ مۇقاباسى كوك ءتۇستى كونمەن قاپتالعان. ءبىراق ساقتالۋى ناشار، پاراقتارى ءبىر- بىرىنە جابىسىپ قالعان. ءتىپتى، اشىپ قاراۋعا كەلمەيدى. جازۋى وقىلۋعا كەلەتىن ءبىرىنشى بەتىنەن «ءبىز مۇندايلاردان ەمەسپىز» دەگەن سويلەمنىڭ جوباسى انىقتالعان.