مۇعالىمدەر اراسىندا احمەت بايتۇرسىن ۇلى اتىنداعى بايقاۋ وتەدى
بايقاۋدى ق ر مادەنيەت جانە سپورت مينيسترلىگى ءتىل ساياساتى كوميتەتى شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى ۇيىمداستىرماق، دەپ حابارلايدى قازاقپارات.
بايقاۋدىڭ ماقساتى - قوعام قايراتكەرى، قازاقتىڭ ۇلتتىق عىلىمىنىڭ كوشباسشىسى احمەت بايتۇرسىن ۇلىنىڭ عىلىمي-پەداگوگيكالىق مۇرالارىنىنىڭ ساباقتاستىعىن جالعاستىرۋ. سونداي-اق، مەملەكەتتىك ءتىلدىڭ قولدانىلۋ اياسىن كەڭەيتۋ جانە ونى ساپالى وقىتۋ ماقساتىن جۇزەگە اسىرىپ جۇرگەن ۇزدىك وقىتۋشىلاردىڭ جاڭاشىل ءادىس-تاسىلدەردى قولدانۋداعى جۇمىس تاجىريبەسىمەن تانىسۋ، قازاق ءتىلىنىڭ جاس ماماندارى اراسىندا شىعارماشىلىقپەن جۇمىس جاسايتىن وقىتۋشىلاردى انىقتاپ، وزىق تاجىريبەلەرىن تاراتۋ، سونداي-اق مەملەكەتتىك ءتىلدى وقىتىپ جۇرگەن وقىتۋشىلاردىڭ كاسىبي بەدەلى مەن قوعامداعى مارتەبەسىن ارتتىرۋ بولىپ وتىر.
رەسپۋبليكالىق بايقاۋ ءۇش كەزەڭنەن تۇرادى: ءبىرىنشى كەزەڭ - قاتىسۋشىلاردىڭ وزدەرى، وقۋ ماتەريالدارى جانە جەتىستىكتەرى جايلى الدىن الا دايىنداعان بەينەتانىستىرىلىم كورسەتەدى. ەكىنشى كەزەڭ - قاتىسۋشىلاردىڭ پەداگوگيكالىق-پسيحولوگيالىق جاعداياتتارعا ارنالعان تاپسىرمالاردى ورىنداۋى؛ ءۇشىنشى كەزەڭ - 20-25 مينۋت كولەمىندە ساباق ۇلگىسىن كورسەتۋ.
اتالعان شاراعا ەلىمىزدىڭ 16 ءوڭىرىنىڭ وقىتۋشىلارى قاتىسادى. رەسپۋبليكالىق بايقاۋ جەڭىمپازدارىن ادىسكەر-عالىمداردان قۇرالعان قازىلار القاسى انىقتايدى. جەڭىمپازدار ارنايى ديپلومدار، العىسحاتتارمەن جانە قارجىلاي سىيلىقتارمەن ماراپاتتالادى.
«احمەت بايتۇرسىن ۇلى - قازاق ءتىل ءبىلىمى مەن قازاق ءتىلىن وقىتۋ ادىستەمەسىنىڭ نەگىزىن قالاعان عالىم-ۇستاز ەكەندىگى كوكىرەگى وياۋ، كوزى اشىق ورتاعا ايان. عالىمنىڭ قازاق ءتىلىن وقىتۋعا ارنالعان «مەتوديكا ماسەلەلەرى»، «قاي ءادىس جاقسى؟»، «وقۋ قۇرالى» جانە ت. ب. مۇرالارى جاس عالىم-زەرتتەۋشى، پەداگوگ-ادىسكەر جاستارعا ماڭگى ازىق بولارى ءسوزسىز. قازىرگى تاڭدا زەرتتەۋشى- ادىسكەرلەر قازاق ءتىلىن ۇيرەتۋدە قولدانىلىپ جۇرگەن وقىتۋدىڭ ءتيىمدى جاڭاشىل تەحنولوگيالارى جايلى يدەيالاردىڭ احمەت بايتۇرسىن ۇلىنىڭ ادىستەمەلىك ەڭبەكتەرىنەن باستاۋ الاتىندىعىن دالەلدەپ ءجۇر. سوندىقتان ۇلت عالىمىنىڭ ءادىس-تاسىلدەرى جايلى تۇجىرىمدارىنىڭ ومىرشەڭدىگىن زەردەلەي وتىرىپ، قازاق ءتىلىن وقىتۋ ادىستەمەسىنە تولىققاندى پايدالانۋ ارقىلى ونىڭ مۇرالارىن جاڭعىرتۋ جاس وقىتۋشىلاردىڭ قۇزىرىندا»، - دەلىنگەن باسپا ءسوز بايانىندا.