ەلباسى ماسكەۋدەگى «قازاقستان» پاۆيلونىنىڭ اشىلۋىنا قاتىستى

ماسكەۋ. قازاقپارات -  قازاقستاننىڭ تۇڭعىش پرەزيدەنتى نۇرسۇلتان نازاربايەۆ ماسكەۋدە حالىق شارۋاشىلىعى جەتىستىكتەرى كورمەسىندەگى «قازاقستان» پاۆيلونىنىڭ اشىلۋ راسىمىنە قاتىستى، دەپ حابارلايدى قازاقپارات.

سالتاناتتى راسىمگە ەلباسىمەن بىرگە رەسەي پرەزيدەنتى ۆلاديمير پۋتين، قوس ەلدىڭ ۇكىمەت باسشىلارى اسقار مامين مەن دميتري مەدۆەديەۆ قاتىستى.

كورمەدەگى قازاق س س ر العاشقى پاۆيلونى العاش رەت 1937-جىلى اشىلعان. ول التى بۇرىشتان تۇراتىن، گالەرەيالارمەن قورشالعان، دەكوراتيۆتى مۇناراسى بار عيماراتتا ورنالاسقان ەدى.

ول كەزدە بۇكىل كونسترۋكتسيا اعاشتان جاسالعان بولاتىن. ەكىنشى دۇنيەجۇزىلىك سوعىستان كەيىن پاۆيلون جاڭاسىنا اۋىستىرىلدى.

سودان كەيىن ول تەك 1954-جىلى عانا كەلۋشىلەرگە ەسىگىن ايقارا اشتى. پاۆيلوننىڭ ەكسپوزيتسياسى رەسپۋبليكانىڭ ەكونوميكا، مادەنيەت، ونەركاسىپ، مال جانە وسىمدىك شارۋاشىلىعىنداعى جەتىستىكتەرىمەن تولتىرىلعان ەدى.

50-جىلداردىڭ سوڭىندا يندۋستريا تاقىرىبىنا ارنالسا، 1964-جىلدان بەرى قازاقستان پاۆيلونى «مەتاللۋرگيا» دەپ اتالدى.

كەڭەس وداعى قۇلاعانعا دەيىن وسى اتاۋمەن ءومىر ءسۇردى. ال 90-جىلداردان كەيىن مۇندا دۇكەندەر، كەڭسەلەر، كوممەرتسيالىق مۋزەيلەر مەن ءدامحانالار جۇمىس ىستەپ كەلدى.

2011-جىلى رەسەي تاراپى عيماراتتى قازاقستانعا جالعا بەرۋ جونىندە شەشىم قابىلدادى.

قازاقستاننىڭ رەسەيدەگى ەلشىلىگىنىڭ قولداۋىمەن عيمارات قايتا جاڭعىرتىلىپ، قاسبەتى، ينتەرەرى مەن سكۋلپتۋرالىق كومپوزيتسيالار قالپىنا كەلتىرىلدى.

ورتالىق كورمە زالىنىڭ ۇستىنە شىنى كۇمبەز تۇرعىزىلدى. بۇگىن دە 65 جىل بۇرىنعىداي پاۆيلوننىڭ كىرەبەرىس اركاسىندا قوناقتاردى اقىن جامبىل جابايەۆ پەن سوتسياليستىك ەڭبەك ەرى شىعاناق بەرسيەۆتىڭ ءمۇسىنى قارسى الىپ تۇر.