تولەبيلىك كاسىپكەر تاۋ بوكتەرىنە قۇلپىناي ەگىپ، تابىسقا كەنەلىپ وتىر

تۇركىستان. قازاقپارات - تۇركىستان وبلىسىندا تولەبيلىك كاسىپكەر تاۋ بوكتەرىنە قۇلپىناي ەگۋدى قولعا الدى.

العاباس ەلدى مەكەنىنىڭ تۇرعىنى قانات جيەنبايەۆ بوس جاتقان جەرگە جەمىستىڭ وسى ءتۇرىن ەگىپ، مول تابىسقا كەنەلىپ وتىر، دەپ حابارلايدى قازاقپارات ءتىلشىسى.

جەكە كاسىپكەر 2015 -جىلدان بەرى بوس جاتقان 70 سوتتىق جەرىنىڭ 50 سوتتىعىنا تامشىلاتىپ سۋعارۋ ءادىسىن پايدالانىپ، قۇلپىناي كوشەتتەرىن وتىرعىزعان. اتالعان شارۋاشىلىقتا قاجەتتىلىككە قاراي 4 ادامنان 12 ادامعا دەيىن جەرگىلىكتى تۇرعىنداردى جۇمىسپەن قامتىپ، كۇنىنە ءارقايسىسىنا 2200 تەڭگەدەن تولەۋدە.

قانات جيەنبايەۆتىڭ سوزىنشە، ماۋسىمىنا 1 توننا كولەمىندە قۇلپىناي الادى. ونىمدەرىن مامىر، شىلدە جانە قىركۇيەك ايلارىندا جيناپ، ساۋدالاپ ءجۇر. ديقان الداعى ۋاقىتتا ەشبىر دارىلىك قوسپاسىز ءونىم الۋدى جوسپارلاپ وتىر.

 «ءوز ونىمدەرىمدى بازارعا شىعارىپ اۋرە بولماي- اق، ءوزىمىزدىڭ ءبىرىنشى مامىر، زاعامبار، ىنتىماق اۋىلدارىنا 600 تەڭگەدەن ساتىپ وتىرمىن. «جۇمىس جوق، اقشا جوق» دەپ جۇرگەن ازاماتتاردى وسىندا كەلىپ، ەڭبەكتەنۋگە شاقىرار ەدىم. ءسويتىپ اۋلاسىنداعى بوس جاتقان جەردى يگىلىگىنە جاراتىپ جاتسا، تابىسى دا تۇراقتى بولار ەدى» ، - دەيدى كاسىپكەر.