20:06, 04 - قىركۇيەك 2019 | GMT +6
الماتىدا پوليتسەيلەر قاققان ايەل اۋىر حالدە جاتىر
الماتى. قازاقپارات - الماتىدا پوليتسيا كولىگى قاعىپ كەتكەن ايەلدىڭ قازىرگى جاعدايى تۋرالى دارىگەرلەر ايتىپ بەردى، دەپ حابارلايدى قازاقپارات ءتىلشىسى.
قالالىق قوعامدىق دەنساۋلىق باسقارماسىنىڭ باسپا ءسوز قىزمەتى حابارلاعانداي، ايەل شۇعىل مەديتسينالىق كومەك كورسەتۋ اۋرۋحاناسىنا جەتكىزىلگەن.
«پاتسيەنت جابىق مي جاراقاتىمەن، ميى شايقالىپ، سول جاق يىعى مەن جىلىنشىگى سىنىپ تۇسكەن. قازىر جانساقتاۋ بولىمىندە جاتىر. دارىگەرلەر ونىڭ جاعدايىن تۇراقتى ءارى اۋىر دەپ باعالاپ وتىر»، - دەدى باسپا ءسوز قىزمەتى.
ايتا كەتۋ كەرەك، جول اپاتى تاڭەرتەڭ المالى اۋدانىندا بولعان.
قالالىق پوليتسيا دەپارتامەنتىنىڭ باسپا ءسوز قىزمەتى حابارلاعانداي، ايەل تولە بي كوشەسىنىڭ تىيىم سالىنعان تۇسىنان جولدى كەسىپ وتپەك بولعان. سول ماقساتپەن ول اۆتوبۋستىڭ ارتىنان جۇگىرىپ شىققان. بۇل ساتتە تولە بي كوشەسىمەن باتىسقا بەت تۇزەپ كەلە جاتقان حيۋنداي ماركالى پوليتسيا كولىگى ونى قاعىپ كەتكەن.