ورالماندار باسپاناسى تۋرالى: بىرنەشە وتباسى ءۇيىندى استىندا قالۋى مۇمكىن

نۇر-سۇلتان. قازاقپارات - اقمولا وبلىسىنداعى ورالماندارعا ارنالعان «نۇرلى كوش» شاعىناۋدانىندا باسپانا ساپاسى سىن كوتەرمەيدى.

بۇل جونىندە ءماجىلىس دەپۋتاتى تۇرعىن سىزدىقوۆ پرەمەر-مينيستر اسقار مامينگە دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.

«تاۋەلسىزدىكتىڭ العاشقى جىلدارى مەملەكەتتىڭ شاقىرۋىمەن الىس جانە جاقىن شەت ەلدەردەن تاريحي وتانىنا قونىس اۋدارۋشىلاردى جايعاستىرۋ ماسەلەسىن شەشۋ قاجەت. بىرىنشىدەن، «نۇرلى كوش» اۋىلى قاراپايىم قۇرىلىس ستاندارتتارىنا ساي كەلمەيدى. كوپتەگەن عيماراتتىڭ قابىرعاسى جۇقا، گيپسوكارتونمەن جاسىرىلعان، ىرگەتاسى ءالسىز. قابىرعانى بويلاعان جارىق سۋىق وتكىزىپ قانا قويماي، ادام ومىرىنە دە قاۋىپ توندىرەدى. بىرنەشە وتباسى ءۇيىندى استىندا قالۋى مۇمكىن. وعان تۇرعىنداردىڭ جىل سايىنعى جوندەۋ جۇمىستارى دا كومەكتەسپەيدى. بۇل «قۇستىڭ ۇيشىكتەرى» تۇراتىن جەر ەمەس. تۇرعىندار وسىنداي «جايلىلىق» ءۇشىن قىمبات كوممۋنالدىق جانە ارەندالىق تولەم جاساپ وتىر. ءالى كۇنگە دەيىن ولاردى جەر تەلىمدەرىمەن بىرگە مەنشىككە بەرۋ جولدارى قاراستىرىلماعان»، - دەدى دەپۋتات ءماجىلىستىڭ جالپى وتىرىسىندا.

ونىڭ ايتۋىنشا، قۇرىلىسقا بولىنگەن رەسپۋبليكالىق بيۋدجەت قاراجاتىن بىرەۋلەر جىمقىردى دەگەن قاۋەسەت ءجۇر.

«بۇل قاۋەسەتتى تەرىسكە شىعاراتىن نەگىز جوق. سەبەبى تۇرۋعا جايسىز بۇل اۋىلدى ۇكىمەتتىك كوميسسيا 20 جىل بۇرىن قابىلداعان. تۇرعىندارعا سالتاناتتى تۇردە كىلت تابىستاعان. سىبايلاس جەمقورلىققا قارسى كۇرەس اياسىندا نىسانداردى قابىلداعان شەنەۋنىكتەردى انىقتاپ، اتى-ءجونىن جاريالاۋ قاجەت. زاڭعا سايكەس جاۋاپكەرشىلىك ارتۋ كەرەك»، - دەدى ول.

وسىعان بايلانىستى «حالىق كوممۋنيستەرى» فراكسياسىنىڭ دەپۋتاتتارى پرەمەر-مينيستردەن ارنايى ۇكىمەتتىك كوميسسيا قۇرىپ، ماسەلەنى تۇبەگەيلى شەشۋ شارالارىن قاراستىرۋدى سۇرادى.

اۆتور: ايجان سەرىكجان قىزى