ەلوردادا ازيا ەلدەرى قالامگەرلەرىنىڭ فورۋمى وتەدى
بۇل تۋرالى قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ورتالىق كوممۋنيكاتسيالار قىزمەتىندە وتكەن بريفينگتە ايتتى.
«اۋەلدە بۇل فورۋمعا جاپونيالىق، تۇركيالىق نوبەل سىيلىعىنىڭ لاۋرەاتتارى شاقىرىلعان. وكىنىشكە وراي، ولار كەلە المادى. ەسەسىنە وڭتۇستىك كورەيا، كاتار جانە تۇركيا ەلدەرىنەن 3 نومينانت كەلە جاتىر. قۇرلىقتا 45 مەملەكەت بار. سونىڭ 44 ىنەن جازۋشى شاقىرعانبىز. قازىر 35 ەلدەن 80 گە جۋىق جازۋشى كەلە جاتىر. ۇيىمداستىرۋ جۇمىسىنا مەملەكەت ءوزى جاردەم بەرىپ، قولداۋ كورسەتىپ وتىر. مەملەكەتتىك حاتشى مارات ءتاجين مىرزا شارانى ۇيىمداستىرۋعا تىكەلەي اتسالىسسا، مەملەكەت باسشىسى فورۋمنىڭ اشىلۋىنا قاتىسپاقشى. وسىنىڭ ءوزى ادەبيەتكە دەگەن وڭ كوزقاراس قالىپتاسقانىن كورسەتەدى» ، - دەدى ۇلىقبەك ەسداۋلەت.
ق ر مادەنيەت جانە سپورت ۆيتسە- ءمينيسترى نۇرعيسا داۋەشوۆ اتالمىش فورۋمدى 3 جىلدا ءبىر رەت وتكىزۋ ۇسىنىلاتىنىن ايتادى.
«ازيا قالامگەرلەرىنە وسى فورۋمدى 3 جىل سايىن ءارتۇرلى مەملەكەتتە وتكىزۋدى ۇسىنباقپىز. سونداي- اق، ازيا جازۋشىلارى كوميتەتىن قۇرىپ، شتاب پاتەرىن نۇر- سۇلتان قالاسىندا اشۋدى جوسپارلاپ وتىرمىز. اۋدارما ىسىنە، سونىڭ ىشىندە قازاق اۆتورلارىن ازيا تىلدەرىنە اۋدارۋ بويىنشا دا ناقتى ۇسىنىستارىمىز بار. فورۋم بارىسىندا وسى تاقىرىپتاردا پىكىر الماسىپ، كەلىسسوزدەر جۇرگىزەمىز» ، - دەدى مينيسترلىك وكىلى.
قازاقستان جازۋشىلار وداعى ءتوراعاسىنىڭ ورىنباسارى اقبەرەن ەلگەزەكتىڭ ايتۋىنشا، 2 كۇنگە سوزىلاتىن شارا بارىسىندا پايدالى دارىستەر مەن اشىق پىكىرتالاستار ۇيىمداستىرۋ جوسپارلانعان.
«فورۋم جۇمىسى 3 كۇنگە سوزىلادى. ەرتەڭ پلەنارلىق وتىرىسى وتەدى. ەكى بولىمدە 11 سپيكەر بايانداما وقيدى. كەلەسى كۇنى TED.9 فورماتىندا ارنايى شارا وتەدى. وندا 10 سپيكەر ءدارىس وقىپ، ەركىن فورماتتا سۇحباتتاسادى. سونداي- اق، اباي كوشەسىنىڭ بويىندا «قالامگەرلەر اللەياسى» اشىلادى. شارا اياسىندا ورتالىق ازيا قالامگەرلەرىنىڭ كەزدەسۋى وتەدى. وندا ۇلى جىبەك جولى بويىنداعى ادەبيەتتىڭ بولاشاعى تۋرالى ايتىلدى. فورۋم شەڭبەرىندە جاس ازيا قالامگەرلەرىنىڭ كەزدەسۋى دە جوسپارلانعان» ، - دەيدى ول.
ق ر پرەزيدەنتى اكىمشىلىگى مەن ق ر مادەنيەت جانە سپورت مينيسترلىگىنىڭ قولداۋىمان وتەتىن شارا 4-6 - قىركۇيەك كۇندەرىنە جوسپارلانعان. فورۋمعا نوبەل سىيلىعىنىڭ نومينانتتارى، بۋكەر جانە ASEAN سىيلىقتارىنىڭ لاۋرەاتتارى، جازۋشىلار وداقتارى مەن قاۋىمداستىقتارىنىڭ ءتوراعالارىنان قۇرالعان 90 قوناق كەلەدى دەگەن جوسپار بار.