كەلەسى جىلى ەلوردادا اسكەري پاراد وتكىزىلەدى
«قاۋىپسىزدىك كەڭەسىنىڭ ءتوراعاسى نۇرسۇلتان نازاربايەۆ قورعانىس ءمينيسترى نۇرلان ەرمەكبايەۆتى قابىلدادى. كەزدەسۋ بارىسىندا ەلباسىنا ەلىمىزدىڭ قورعانىس قابىلەتىن نىعايتۋ، قارۋلى كۇشتەردىڭ بولىمشەلەرى مەن قۇرامالارىنىڭ جاۋىنگەرلىك دايارلىعىن ارتتىرۋ بويىنشا جۇرگىزىلىپ جاتقان جۇمىستار تۋرالى باياندالدى»، دەلىنگەن حابارلامادا.
سونىمەن قاتار، نۇرسۇلتان نازاربايەۆقا وسى ۋاقىتقا دەيىن وتكىزىلگەن جانە جىل سوڭىنا دەيىن جوسپارلانعان اۋقىمدى جاتتىعۋلار تۋرالى اقپارات بەرىلدى.
كەزدەسۋدە باسشىلىق لاۋازىمداردىڭ سانىن قىسقارتۋ جانە باسقارۋ قۇرىلىمىن وڭتايلاندىرۋ بويىنشا جۇمىس ناتيجەلەرىنە ەرەكشە نازار اۋدارىلدى.
قازاقستاننىڭ تۇڭعىش پرەزيدەنتى كەلەسى جىلى ەلوردادا ۇ و س- داعى جەڭىستىڭ 75 جىلدىعى جانە وتان قورعاۋشى كۇنىنە ارنالعان اسكەري پارادتىڭ ساپالى وتكىزىلۋىن قامتاماسىز ەتۋدى تاپسىردى.
سونداي-اق، نۇرسۇلتان نازاربايەۆ وتاندىق قورعانىس ونەركاسىبىنىڭ قورعانىس مينيسترلىگىنىڭ مۇددەسىنە ساي ساپالى جۇمىسىن قامتاماسىز ەتۋدىڭ ماڭىزدىلىعىن اتاپ ءوتتى.
ءوز كەزەگىندە نۇرلان ەرمەكبايەۆ قازاقستان ارمياسىنىڭ قۇرىلىس جانە دامۋ باعدارلامالارىنىڭ ورىندالۋى تۋرالى باياندادى. قورعانىس ءمينيسترىنىڭ اقپاراتى بويىنشا قازىرگى ۋاقىتتا اسكەري تەحنيكانىڭ زاماناۋي ۇلگىلەرى جانە جۇيەلەرىمەن جابدىقتاۋ جالعاسۋدا، قارۋلى كۇشتەردى جان- جاقتى قامتاماسىز ەتۋ جۇيەسى جەتىلدىرىلۋدە، وق-دارىلەردى قاۋىپسىز ساقتاۋ بويىنشا شارالار قابىلدانۋدا.