گۋاڭجوۋ سوتىندا اقجارقىن تۇرلىبايدىڭ ىسىنە قاتىستى وتىرىس ءوتتى

گۋاڭجوۋ. قازاقپارات - سىرتقى ىستەر مينيسترلىگى قىتايدا ەسىرتكى كونترابانداسىمەن ايىپتالعان اقجارقىن تۇرلىبايعا قاتىستى قوزعالعان قىلمىستىق ءىس بويىنشا سوت وتىرىسى وتكەنىن جاريا ەتتى، دەپ حابارلايدى قازاقپارات ءتىلشىسى.

«بۇگىن گۋاڭجوۋ سوتىندا ەسىرتكى كونترابانداسىمەن ايىپتالعان اقجارقىن تۇرلىبايعا قاتىستى قوزعالعان قىلمىستىق ءىس بويىنشا وتىرىس ءوتتى. وتىرىس بارىسىندا قورعاۋشى تاراپ ۇسىنعان قىلمىستىق ءىستىڭ ماتەريالدارى قارالدى. وتىرىسقا قورعاۋشىلار، قازاقستاننىڭ قىتايداعى ەلشىلىگىنىڭ وكىلدەرى، اقجارقىن تۇرلىبايدىڭ اناسى جانە اۋدارماشى قاتىستى. كەزدەسۋ ساعات 10.00 نان باستاپ (گۋاڭجوۋ ۋاقىتى) 2 ساعاتتان استام ۋاقىتقا سوزىلدى»، - دەپ ق ر سىرتقى ىستەر مينيسترلىگىنىڭ Telegram-داعى پاراقشاسىندا.

مينيسترلىكتىڭ حابارلاۋىنشا، اقجارقىن تۇرلىبايدىڭ دەنساۋلىعى جاقسى. سوتتا ءوزىن-ءوزى جاقسى ۇستاپ، سوت تاراپىنان قويىلعان سۇراقتارعا ءوز بەتىنشە قىتاي تىلىندە تۇسىنىكتەمە بەرگەن.

«ۇكىمنىڭ جاريالاناتىن كۇنى اشىق»، دەلىنگەن حابارلامادا.

ەسكە سالا كەتەيىك، 21 جاستاعى قازاق قىزى اقجارقىن تۇرلىباي 2014 -جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلدى، اقجارقىن ول تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن ايىپتاپ، ءومىر بويىنا باس بوستاندىعىنان ايىردى. 2016 -جىلى 7 -ساۋىردە اپەللياتسيالىق ساتىداعى سوت اقجارقىن تۇرلىبايدى ءومىر بويىنا باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى قاۋلى ەتكەن بولاتىن.

اۆتور: ايان بەكەن ۇلى