نۇرلان ءابدىروۆ: ۇلتتىق قورعا قايتا-قايتا قولىمىزدى سۇعا بەرمەۋىمىز كەرەك

None
None
نۇر-سۇلتان. قازاقپارات - ۇلتتىق قورعا قايتا-قايتا قولىمىزدى سۇعا بەرمەۋىمىز كەرەك. پرەزيدەنتتىڭ ۇلتتىق قور قاراجاتىنا بايلانىستى ەسكەرتپەسى جايلى پارلامەنت ءماجىلىسىنىڭ دەپۋتاتى نۇرلان ءابدىروۆ پىكىر ءبىلدىردى، دەپ حابارلايدى قازاقپارات ءتىلشىسى.

«بۇگىنگى جولداۋدا كوپ اڭگىمە ايتىلدى. كەڭ كولەمدە ايتىلدى. بايقاساڭىزدار، كەيبىر ماسەلەلەردى مەملەكەت باسشىسى جاي عانا اتاپ-اتاپ قانا ءوتتى. سەبەبى، ايتىلىپ جۇرگەن كەيبىر سۇراقتاردى وڭىرلەرگە شىققاندا، مۇعالىمدەرمەن كەزدەسكەندە كەڭ اۋقىمدا قاۋزاعان بولاتىن. ەلدىڭ ىشىندە ءارتۇرلى نارازىلىق تۋعىزاتىن جايلارعا دا مەملەكەت باسشىسى ماڭىز بەرىپ وتىر. ءاربىر زاڭدى نەمەسە تاپسىرمانى ورىنداۋ - ۇلكەن تالداۋ جۇمىستارىن تالاپ ەتەدى. سول سەبەپتى، جالپى قارجىنىڭ پايدالانىلۋىنا، مەملەكەتتىك قورعا بايلانىستى اڭگىمەلەر تەككە كوتەرىلىپ وتىرعان جوق. ۇلتتىق قورعا قايتا- قايتا قولىمىزدى سۇعا بەرمەۋىمىز كەرەك»، - دەدى نۇرلان ءابدىروۆ پارلامەنتتىڭ بىرلەسكەن وتىرىسىنان كەيىن تىلشىلەردىڭ ساۋالدارىنا جاۋاپ بەرە وتىرىپ.

دەپۋتاتتىڭ ايتۋىنشا، ەگەر شاعىن جانە ميكرو كاسىپ يەلەرى تابىس سالىعىنان بوساتىلاتىن بولسا، وندا ەلدەگى سالىق بازاسى ازايادى.

«ونى مەملەكەت باسشىسى تىكە ايتىپ شىقتى. ولاي بولاتىن بولسا، جەرگىلىكتى جەردەگى بيلىك وندىرىستەردى كوتەرۋى ءتيىس. ادامداردى وندىرىسپەن اينالىسۋعا، پايدالى زاتتاردى شىعارۋعا، وڭىردەگى ادامداردىڭ ءتيمىدى ءومىر سۇرۋگە شاقىرۋى ءتيىس»، - دەدى نۇرلان ءابدىروۆ.

ەسكە سالا كەتسەك، بۇگىن ق ر پرەزيدەنتى قاسىم-جومارت توقايەۆ قازاقستان حالقىنا جولداۋىن جاريالادى.

«ۇلتتىق قور قاراجاتىنىڭ اعىمداعى ماسەلەلەردى شەشۋگە جۇمسالۋىن قىسقارتۋ قاجەت. بۇل كەلەشەك ۇرپاقتىڭ قارجىسى. ۇلتتىق قوردىڭ ترانسفەرتتەرى باسەكەگە قابىلەتتى ەكونوميكانى قالىپتاستىرۋعا باعىتتالعان باعدارلامالاردى جانە جوبالاردى جۇزەگە اسىرۋ ءۇشىن عانا ءبولىنۋى كەرەك»، - دەدى قاسىم-جومارت توقايەۆ.

اۆتور: ايان بەكەن ۇلى

سوڭعى جاڭالىقتار