ەلوردادا ءۇش اۋىسىمدى مەكتەپتەر ماسەلەسى قاشان شەشىلەدى؟

نۇر-سۇلتان. قازاقپارات -  ەلوردالىق ءبىلىم باسقارماسىنىڭ وكىلدەرى قالاداعى ءۇش اۋىسىمدى مەكتەپتەردىڭ ماسەلەسى قاشان شەشىلەتىنىن ايتىپ بەردى، دەپ حابارلايدى قازاقپارات ءتىلشىسى.

نۇر-سۇلتان قالاسى ءبىلىم باسقارماسىنىڭ باسشىسى ءانۋار جانعوزيننىڭ سوزىنە قاراعاندا، بيىلعى وقۋ جىلىندا ەلوردا مەكتەپتەرىندە 173 مىڭ وقۋشى ءبىلىم الماق. ونىڭ 22 مىڭى العاش رەت مەكتەپ تابالدىرىعىن اتتاپ وتىر.

«جىل سوڭىنا دەيىن تاعى 3 جاڭا مەكتەپ پەن 4 قوسىمشا قۇرىلىستى قولدانىسقا بەرمەكپىز. وسىنىڭ ارقاسىندا ءۇش اۋىسىممەن جۇمىس ىستەيتىن 2 مەكتەپتىڭ ماسەلەسىن شەشەمىز. سوندا دا قالاداعى 8 مەكتەپتە ءۇش اۋىسىمدىق جۇيە ساقتالادى. بۇل ماسەلەنى الداعى 3-4 جىلدىڭ ىشىندە جاڭا مەكتەپتەر سالۋ ارقىلى شەشەمىز»،- دەدى ءانۋار جانعوزين اباي قۇنانباي ۇلى اتىنداعى 87№ مەكتەپ-گيمنازيانىڭ اشىلۋ سالتاناتىنان كەيىن.

باسقارما باسشىسى ب ا ق وكىلدەرىنە مەكتەپ سالۋعا اتسالىسقان ينۆەستورلارعا قۇرىلىسقا ارنالعان جەر تەگىن بەرىلەتىنىن ايتتى.

«قىزمەت اقىسى ايىنا 80 مىڭ تەڭگەنىڭ كولەمىندە بولاتىن مەكتەپتەر سۇرانىسقا يە ەكەنىن كورىپ وتىرمىز. اتا-انالار قىزىقپاسا، قازىرگىدەي كەزەك پايدا بولماس ەدى. مۇنداي مەكتەپتەر كوبەيگەن سايىن باسەكە ارتىپ، ءبىلىم ساپاسى جوعارى، باعاسى ارزان بولا تۇسەدى»، - دەدى ءانۋار جانعوزين.

ەسكە سالساق، بۇگىن ق ر پرەمەر-ءمينيسترى اسقار مامين نۇر-سۇلتاندا اباي قۇنانباي ۇلى اتىنداعى 87№ مەكتەپ-گيمنازيانىڭ اشىلۋ سالتاناتىنا قاتىستى.