پرەزيدەنت جۇلدەسىن «حابار» ارناسى جەڭىپ الدى

نۇر-سۇلتان. قازاقپارات - «استانا- ارەنادا» پرەزيدەنت جۇلدەسى ءۇشىن جۋرناليستەر اراسىنداعى شاعىن فۋتبولدان وتكەن تۋرنيردىڭ جەڭىمپازدارى انىقتالدى، دەپ حابارلايدى قازاقپارات ءتىلشىسى.

ەسكە سالا كەتسەك، بۇگىن «استانا- ارەنادا» جۋرناليستەر پرەزيدەنت جۇلدەسى ءۇشىن شاعىن فۋتبولدان ءوزارا مىقتىنى انىقتاعان بولاتىن. باق وكىلدەرى اراسىندا قازاقستان رەسپۋبليكاسى پرەزيدەنتىنىڭ جۇلدەسى ءۇشىن شاعىن فۋتبولدان رەسپۋبليكالىق تۋرنير كونستيتۋتسياسى كۇنىنە وراي ۇيىمداستىرىلعان.

تۋرنيردىڭ ماقساتى – ب ا ق قىزمەتكەرلەرى اراسىندا سالاۋاتتى ءومىر سالتىن ناسيحاتتاۋ، ارىپتەستىك جانە دوستىق قارىم- قاتىناستى نىعايتۋ بولىپ وتىر. شاعىن فۋتبولدان ءوتىپ جاتقان تۋرنيرگە اقمەشىت، جەتىسۋ تدك، ن گ س، باسپا ءسوز پرەزيدەنت، ەۋرازيا ورت، قازسپورت، حابار24, قازاقنيۋس، قىزىلجار، قازمەديا، سپورت 59, وسكەمەن، تاراز، حابار، تۇركىستان، ايقىن ليتەر، ەگەمەن قازاقستان، ەل ارنا، شىمكەنت، اتامەكەن، قازاق راديولارى، QSport، ەلوردا اقپارات، اپورت، ورال سىندى كوماندالار قاتىستى.

تارتىستى ويىندا «حابار» ارناسى جەڭىمپاز اتانسا، ەكىنشى ورىندى «Qazsport» يەلەندى. ءۇشىنشى ورىن «حابار 24» كومانداسىنا بۇيىردى. 1-ورىن يەگەرلەرىنە 1,5 ميلليون تەڭگە، 2 -ورىنعا 700 مىڭ تەڭگە، 3 -ورىنعا 300 مىڭ تەڭگە بەرىلدى. سونىمەن قاتار، ۇزدىك ويىنشىلار 100 مىڭ تەڭگە كولەمىندە اقشالاي سىيلىقپەن ماراپاتتالدى.