جەلىنى شۋلاتقان «شىمكەنتتىك» جارناما

None
None
نۇر-سۇلتان. قازاقپارات - اۆتوكولىك جۇرگىزۋشىلەرىنە ارنالعان قازاقستاندىق kolesa.kz سايتىنا ەرەكشە جارناما جاريالاندى.

نەگىزىنەن كوبىنەسە ورىس تىلىندە حابارلاندىرۋ، جارناما بەرىلەتىن سايتقا بۇل جولى كولىك يەسى حابارلاندىرۋدى قازاقشا جازىپتى. ازىلگە بۇرا وتىرىپ جازىلعان جارنامادا اۆتوكولىككە ايرىقشا مىنەزدەمە جاسالعان.

جەلى قولدانۋشىلار ءجيى تالقىلاپ، ءبىر- بىرىنە whatsapp ارقىلى جولداپ جاتقان جارنامانىڭ ءماتىنى تومەندەگىدەي: «BMWساتىلادى! ءتۇسى: چەرنىي جەمچۋك. وبەمى: 2.8.تيپترونيك. جاسى 21 دە، ياعني 1998 -جىلعى. ۇلتى نەمىس -  اريەتس! كەزىندە گەرمانيادان ارمەنياداعى اعايىندارىنا قىدىرىپ كەلگەندە، يەسىنەن قاس پەن كوزدىڭ اراسىندا ايىرىلىپ قالىپ، جەتىم ءوسىپ، ودان قازاقستانعا دەپورتاتسيالانعان كولىك. سودان بەرى ءوز قولىمدا. تاعدىر دەگەندە قىزىق-اۋ، ءبىر زامانداردا بەرليننىڭ ءتۇزۋ قارا اسفالتىمەن زۋلاپ جۇرگەن كولىك ەدى، بۇل كۇندەرى شىم-قالانىڭ تاقتايداي (جونىلماعان) اق اسفالتىمەن «ايىرىپ» ءجۇر. «جەتىم قوزى تاس باۋىر»، -  دەمەكشى، ازداپ تەنتەكتەۋ ەدى، قازىر جاقسى. العاشقى كەزدەرى ورمانعا ۇلىعان قاسقىرداي اراسىندا باتىسقا قاراپ جاۋتەڭدەپ تۇراتىن! قايتسىن وتانىنان ايىرىلۋ وڭاي ما -  گەرمانياسىن ساعىنعان ءتۇرى عوي. سودان مەن دە ەرەگەسكەندە «دو كونسا» باراتىنىما سالىپ ءۇيدىڭ اۋلاسىنا كەلگەندە تۇمسىعىن باتىس بەتكە ەمەس، شىعىسقا - قوشقار اتا جاققا قاراي بۇرىپ قويىپ ءجۇردىم. ءسويتىپ گەرمانياسىن ۇمىتتىرىپ، ناعىز قازاقى كولىككە اينالدىردىم. (ءتىلى جوق ايتپەسە ءدال قازىر رۋىڭ كىم دەسەڭ باعىسپىن دەپ تۇراتىن ەدى.) جۇرىسىنە اڭگىمە جوق. وكىرىپ الىپ باسقاندا، وكىرتىپ وتىرعان ءوزىڭ ەكەنىڭدى سەزىنىپ ءماز بولاسىڭ. ناعىز ەركەكتىڭ كولىگى. موتورىنىڭ داۋىسى -  جۋان. وزىنەن باسقا كولىكتەرمەن جارىسقاندا شاڭىنا ىلەستىرمەيتىن جەل اياق. حودوۆكاسى زىڭ. موتورى تاپ تازا. بەنزين. گاز قويىلماعان. دالادا قالدىرىپ كورگەن جوق، جولداستىققا جاقسى، ادال. شىنىمدى ايتسام ساتۋعا دا قيمايمىن، تەك «يت تىرلىكتىڭ» يتشىلىك قاردەر-قاجەتشىلىگى بىتپەي، قاراجاتتىڭ كەرەك بولىپ تۇرعانى. باستاپقى باعاسى 1 ميلليون 600 دەپ وتىرمىز.» بۇل حابارلاندىرۋدى 27 -تامىزدان بەرى 98639 ادام قاراپ، 147 كوممەنتاري جازىپ ۇلگەرگەن. 



سوڭعى جاڭالىقتار