ەلوردالىق ونەرتاپقىشتار سۋمەن جاناتىن پەش جاساپ شىعاردى

نۇر-سۇلتان. قازاقپارات - ەلوردالىقتار سۋمەن جاناتىن پەش جاساپ، ايدى اسپانعا شىعاردى.

ارقانىڭ ارقىراعان قىسىندا كومىر ۇنەمدەۋدىڭ تىڭ ءادىسىن «حابار 24» ءتىلشىسى عازيزا مۇحامەدجانوۆا ءبىلىپ قايتتى.

عازيزا مۇحامەدجانوۆا، ءتىلشى:

 - مىنا پەشتىڭ قۋاتتىلىعى مىڭ گرادۋسقا دەيىن جەتەدى. ۇزىندىعى ەكى مەتر شاماسىنداعى جىلىتۋ قۇرالىنىڭ ىشىنە ارنايى كىرپىشتەر قالانعان. ءبىر قىزىعى، بۇل پەشتى كومىرمەن تۇتاتىپ، سۋمەن قىزدىرۋعا بولادى. مىنا بۋنكەرگە كومىر سالىنادى. سالىنىپ، قاقپاعى جابىلعاننان كەيىن ەسىكتى اشىپ، تۇتاتامىز. وت جاققانان كەيىن 10 مينۋت قىزدىرامىز. قىزدىرعاننان كەيىن سۋدى بەرەمىز. مىناۋ تامشىلاۋ جۇيەسى. رەاكتورعا تۇسكەن سۋ قۇرعاق بۋعا اينالادى. جوعارى تەمپەراتۋرادان بۋ ىدىراپ، ناتيجەسىندە سۋتەگى پايدا بولادى. وسى سۋتەگى پەشتىڭ ۇزاق جانۋىن قامتاماسىز ەتەدى. سايكەسىنشە، كومىردى دە ۇنەمدەيدى.

سايات قۇلمانبەتوۆ، جوبا اۆتورلارىنىڭ ءبىرى:

 - ءبىر قازاندىقتى دايىنداۋعا ورتا ەسەپپەن ءۇش كۇن كەتەدى. قازىر مۇندا بەس ادام جۇمىس ىستەيدى. ءبىر ايدا 15 پەش قۇراستىرامىز. ال جوعارى قۋاتتى قوندىرعىلار مەن جۇمىس كۇشىن كوبەيتۋ ارقىلى ءوندىرىس كولەمىن ۇلعايتۋعا بولادى. ماقساتىمىز - ايىنا 80-100 قازاندىق شىعارۋ.

ەكولوگيالىق ءارى ەكونوميكالىق ءتيىمدى قوندىرعىنى جاساماس بۇرىن ينجەنەرلەر سالانى ءبىراز زەرتتەگەن. وزگە جىلىتۋ پەشتەرىندەگى كەمشىلىكتەردى ەسكەرىپ، بارىنشا پايدالانۋعا قولايلى قۇرال شىعارعان. ءبىر جىل تاجىريبەدەن وتكىزىپ، زاماناۋي پەشتىڭ ارتىقشىلىقتارىنا الدىمەن وزدەرى كوز جەتكىزگەن.

 بولات كارييەۆ، ينجەنەر:

- نەگىزى ايتادى عوي سپورتتا، سامبودا ءارتۇرلى سالانىڭ جەتىستىكتەرى جينالىپ، سولاي قۇرالادى دەپ. بۇل دا سونداي. بارلىق بۇگىنگى كۇنگى تەحنولوگيانىڭ جەتىستىكتەرىمەن ەسەپتەلىپ جاسالعان دۇنيە.

ونەرتاپقىشتار «الەۋمەتتىك ماڭىزى بار نىسانداردا وسىنداي قازاندىقتى پايدالانۋ ارقىلى ءبىراز قارجى ۇنەمدەۋگە بولادى»، دەيدى.

قازىر اۆتورلار پەشكە ارنايى قۇرىلعى ورناتىپ، قاشىقتىقتان باسقارۋ جۇيەسىن ەنگىزبەك. سوندىقتان ۇيدەگى پەشتىڭ تەمپەراتۋراسىن تۇزدە ءجۇرىپ، تەلەفونمەن وزگەرتكەن ادامدى كورسەڭىز تاڭعالماڭىز.