افينادا اباي شىعارمالارى وقىلدى
ءىس- شاراعا گرەكيانىڭ بەدەلدى اكادەميالىق، ىسكەرلىك وكىلدەرى، جانە دە گرەكيالىق قوعام جانە مادەني قايراتكەرلەرىنەن قۇرىلعان قازاقستاننىڭ كوپتەگەن دوستارى قاتىستى. سونىمەن قاتار، قوناقتار قاتارىندا ديپلوماتيالىق ميسسيالار مەن حالىقارالىق ۇيىمدار باسشىلارى، جۋرناليستەر، بۇرىنعى وتانداستارىمىز بەن قازاق دياسپوراسىنىڭ وكىلدەرى ات سالىستى. ادەبي كەشتە ءسوز باستاعان قازاقستاننىڭ گرەكياداعى ەلشىسى الەكسەي ۆولكوۆ ق ر پرەزيدەنتى قاسىم- جومارت توقايەۆتىڭ 30 - مامىردا حالقىمىزدىڭ ۇلى ويشىلى مەن اعارتۋشىسى اباي قۇنانباي ۇلىنىڭ 175 جىلدىعىن 2020 -جىلدا اتاپ ءوتۋ تۋرالى ءتيىستى جارلىققا قول قويعانىن ايتتى. ول حاكىم ابايدىڭ شىعارماشىلىعىنا گرەكيالىق ويشىلاردىڭ رۋحتاندىراتىن زور ىقپالى تيگەندىگىنە وراي، ءىس- شارا گرەكيالىق ۇلى فيلوسوفتاردىڭ وتانىندا ءوتۋى اسا سيمۆوليكالىق مانگە يە ەكەندىگىن سوزىنە تيەك ەتتى.
وسى ورايدا، ەلشى ابايدىڭ 27- قارا ءسوزى - «سوكرات حاكىمنىڭ ءسوزى» دەپ اتالاتىندىعىن ەرەكشە اتاپ ءوتتى. ءىس- شارا بارىسىندا وتاندىق ەلشى قازاقستان مەن گرەكيانىڭ ۇلتتىق كىتاپحانالارى باسشىلارىنا قر ەلشىلىگى پەن «MM Publication» گرەكيالىق كومپانياسىنىڭ ورتاق تۋىندىسى «قازاقستاننىڭ ۇلتتىق كىتاپحاناسىنداعى گرەك تىلىندەگى كىتاپتار كاتالوگىن» سىيعا تارتتى. بۇل تاقىرىپتىق كاتالوگ قازاقستان مەن ورتالىق ازياداعى ەڭ ۇلكەن كىتاپحانالارىنىڭ بىرىندە ساقتالعان گرەك تىلىندەگى كىتاپتاردىڭ جۇيەلەندىرىلگەن بىرەگەي جيناعى بولىپ تابىلادى. وتاندىق ديپلومات باسىلىم ىشىندەگى كوپتەگەن ەڭبەكتەر تۇڭعىش كاتالوگقا ەنگىزىلۋىنە وراي، ەرەكشە عىلىمي قۇندىلىققا يە ەكەندىگىنە توقتالدى. ءوز كەزەگىندە، قر ۇلتتىق كىتاپحاناسىنىڭ ديرەكتورى باقىتجامال وسپانوۆا ق ر ەلشىلىگى مەن گرەكيالىق تاراپتى ادەبي كەشتى وتكىزۋگە قولعابىس كورسەتكەندەرى ءۇشىن العىس ءبىلدىرىپ، قاتارىندا اباي تۋرالى 1909 -جىلى تۇڭعىش جارىق كورگەن كىتاپتىڭ كوشىرمەسى مەن اقىننىڭ شەت ەل تىلدەرىندە باسىلىپ شىعارىلعان زاماناۋي باسىلىمداردان قۇرىلعان كوللەكتسيالىق جيناقتى تابىستادى. ادەبي كەشتىڭ اياعىندا گرەكيانى قازاقستانمەن ودان ءارى تانىستىرۋ ماقساتىمەن وتانداسىمىز يگور تويكيننىڭ ورىنداۋىندا اباي اندەرى شىرقالىپ، ۇلى اقىنىمىزدىڭ ەڭبەكتەرىنىڭ كىشىگىرىم كورمەسى ۇيىمداستىرىلدى.
