جاقىندا عانا ۆيتسە-پرەمەر اتانعان ساپاربايەۆ ماراپاتتالدى
نۇر-سۇلتان قالاسىندا باقىتجان ءابدىرايىمنىڭ توراعالىعىمەن ق ر كاسىپوداقتار فەدەراتسياسى باس كەڭەسىنىڭ وتىرىسى ءوتتى.
وتىرىس بارىسىندا ق ر ك ف ءتوراعاسى «قازاقستان رەسپۋبليكاسى كاسىپوداقتار فەدەراتسياسىنىڭ 2018-2019-جىلدارعا ارنالعان جاڭعىرتۋ جول كارتاسى» بويىنشا اتقارىلعان جۇمىستار تۋرالى بايانداما وقىدى. بۇل قۇجاتتا الەۋمەتتىك ادىلەتتىلىكتى ناسيحاتتاۋ جانە ەڭبەككەرلەردىڭ قۇقىعىن قورعاۋ شارالارى نەگىزگە الىنعان.
«ەلباسى نۇرسۇلتان نازاربايەۆ كاسىپوداقتار فەدەراتسياسى قازاقستاندىقتاردى ءتورتىنشى ونەركاسىپتىك ريەۆوليۋتسيانىڭ جاڭا شارتتارىنا الەۋمەتتىك بەيىمدەۋ ءۇشىن قوزعاۋشى كۇش بولۋى تيىستىگىن اتاپ ءوتتى»، - دەدى ءوز سوزىندە ءابدىرايىم.
وسى ورايدا فەدەراتسيا باسشىسى كاسىپوداقتار قىزمەتىندەگى وزەكتى ماسەلەلەرگە، سونىڭ ىشىندە ۇجىمدىق شارتتاردىڭ سانىن ارتتىرۋ، ەڭبەك داۋلارىن شەشۋ، ەڭبەك قاتىناستارىن زاڭداستىرۋ، جۇمىس ورىندارىن ساقتاۋ جانە قاۋىپسىز ەڭبەك شارتتارىن قالىپتاستىرۋ ماسەلەلەرىنە توقتالىپ ءوتتى. جول كارتاسىنىڭ باسىم باعىتتارى، سونىڭ ىشىندە ح ە ۇ- نىڭ ستاندارتتارىن ناسيحاتتاۋ جانە كاسىپورىنداردا الەۋمەتتىك تۇراقتىلىقتى قامتاماسىز ەتۋ ماسەلەلەرى ايتىلدى.
سونداي-اق، ق ر پرەزيدەنتى قاسىم-جومارت توقايەۆتىڭ الەۋمەتتىك باستامالارىنىڭ وزەكتىلىگى جانە ءوز ۋاقىتىنا ساي ەكەندىگى، سونىمەن قاتار، كاسىپوداقتاردىڭ باستى قۇندىلىقتارىمەن ۇيلەسىم تاباتىندىعى اتالىپ ءوتتى.
باس كەڭەستىڭ مۇشەلەرى ەلىمىزدە ورىن الىپ جاتقان الەۋمەتتىك- ەڭبەك رەفورمالارى ۋاقىت تالابىنا ساي دەپ ەسەپتەيدى. بۇل رەفورمالار كاسىپوداقتار قىزمەتىن جاڭعىرتۋ جانە ەڭبەك ادامىن قورعاۋداعى تيىمدىلىكتى ارتتىرۋ ءۇشىن باعىت-باعدار بولۋى ءتيىس. وسى رەتتە الەۋمەتتىك ارىپتەستىكتىڭ ەرەكشە ءرولى مەن ارىپتەستىكتى نىعايتۋ ماڭىزدىلىعى كورسەتىلدى.
باقىتجان ءابدىرايىمنىڭ ايتۋىنشا، ق ر ۇكىمەتى، ق ر ك ف جانە «اتامەكەن» ۇ ك پ اراسىنداعى 2018-2020-جىلدارعا ارنالعان باس كەلىسىم، سونىمەن قاتار، 21 سالالىق جانە 16 اۋماقتىق كەلىسىمدەر كاسىپوداقتاردىڭ ءۇشجاقتى كوميسسيا، داعدارىسقا قارسى شتاب، قوعامدىق جانە ۇيلەستىرۋ كەڭەستەرىنىڭ وتىرىسىنا كەڭىنەن قاتىسۋىنا مۇمكىندىك بەردى.
ءۇشجاقتى كوميسسيا اياسىندا مۇشە ۇيىمدار ءتيىستى سالالارداعى كاسىپوداق ۇيىمدارىنىڭ قىزمەتىن بىرىكتىرە الدى. الەۋمەتتىك ارىپتەستەرمەن ءوزارا ىنتىماقتاستىقتىڭ ايقىن دالەلى - كاسىپوداقتار فەدەراتسياسىنا مۇشە ۇيىمدار سانىنىڭ 18 دەن 23 سالالىق كاسىپوداقتارعا ارتۋى بولىپ تابىلادى. 40 مىڭ ەڭبەككەردى قامتيتىن 500 گە جۋىق باستاۋىش كاسىپوداق ۇيىمى قۇرىلدى.
ق ر ك ف باس كەڭەسىنىڭ وتىرىسىندا كاسىپوداق مۇشەلەرىنىڭ سانى 45 مىڭعا جۋىق «QAZMED» مەديتسينا جانە ونىمەن ساباقتاس سالالار قىزمەتكەرلەرىنىڭ سالالىق كاسىپوداعى فەدەراتسيا قۇرامىنا قابىلداندى.
جۇمىس ناتيجەلەرىن قورىتا كەلە، باس كەڭەس مۇشەلەرى قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ماشبەك ۇلى ساپاربايەۆتىڭ الەۋمەتتىك ارىپتەستىك تاراپتارى اراسىندا ءوزارا ءتيىمدى بايلانىس جۇيەسىن قالىپتاستىرۋعا قوسقان ۇلەسىن جوعارى باعالاي وتىرىپ، «ۇزدىك الەۋمەتتىك ارىپتەس» بەلگىسىمەن ماراپاتتادى.
ايماقتىق دەڭگەيدەگى الەۋمەتتىك ارىپتەستىكتى دامىتۋعا قوسقان زور ۇلەستەرى ءۇشىن پاۆلودار وبلىسىنىڭ اكىمى بولات باقاۋوۆتى جانە اتىراۋ وبلىسىنىڭ اكىمى نۇرلان نوعايەۆتى دا وسى بەلگىمەن ماراپاتتاۋ تۋرالى شەشىم قابىلداندى.
وتىرىس سوڭىندا قركف باسشىسى باس كەڭەس مۇشەلەرىن كاسىپوداقتاردىڭ ىنتىماقتاستىعى مەن باستى قۇندىلىقتارىن كەڭىنەن ناسيحاتتاۋعا شاقىردى.