مۇرات اۋەزوۆ: ءتىل مەن ءدىن - ءدىل دەربەستىگى

نۇر-سۇلتان. قازاقپارات - ەلباسى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا: «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە، زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا، ول اداسۋعا باستايدى»، - دەلىنگەن ەدى.

ەل دامۋىنىڭ جارقىن ۇلگىسى مەن ناقتى قادامدارىن كورسەتەتىن كەلەلى وي، ساليقالى پىكىر قوعام جانە مەملەكەت قايراتكەرى، مادەنيەتتانۋشى مۇرات مۇحتار ۇلى اۋەزوۆ پەن جۋرناليست ماحات سادىقتىڭ اڭگىمەلەسكەن ەدى.

- مۇرات مۇحتار ۇلى، 75 دەگەن جاسقا كەلگەندە حالقىڭىزعا ەسەپ بەرگەن «ءدىلىم» اتتى كىتابىڭىزدا «تىلدەن دە، دىننەن دە ايرىلىپ قالا جازداپ، قايتا ورالعان كەزدەرىمىز بولدى، ءالى دە كەزدەسەدى. ال دىلدەن شە؟! ودان ايرىلۋ مۇلدەم مۇمكىن ەمەس، تەك سول ءتىل ساۋلىعى، ءدىل تازالىعى، ءدىل بەرىكتىگى ارقىلى عانا جەكە تۇلعا، دەربەس ۇلت، تاۋەلسىز مەملەكەت رەتىندە ساقتالىپ قالدىق...»، دەپسىز. تاۋەلسىزدىك العانىمىزعا دا وتىز جىلعا جاقىندادى. ناعىز تاۋەلسىز قازاق ەلى بولدىق پا؟ قازاق «وتىزىندا وردا بۇزباعان، قىرىقىندا قامال المايدى» دەيدى.

- كوش جۇرە تۇزەلەدى. ىزدەنىستەر مەن قوعامدىق قوزعالىستار بار. ءۇمىت پەن ماقسات ايقىن. وسىنىڭ ءبارى بۇگىنگى زامانداستار جاساعان جاڭالىق ەمەس. ول ۇلى ابايدان باستاۋ العان قازاق مۇددەسى. وعان جالعاس الاش ازاماتتارىنىڭ قازىرگى، بالكىم كەلەشەك ۇرپاققا قالدىرعان اماناتتارى. بوستاندىق پەن تاۋەلسىزدىك تۇرعىسىنداعى ولاردىڭ ايتىپ جانە جازىپ كەتكەندەرىن تەرەڭنەن تولعاپ زەرتتەۋىمىز كەرەك. جاڭا زاماندا جاڭاشا سىن-قاتەرلەر تۋىنداۋدا. قازاقتى ساقتاپ قالار ءبىر عانا ۇلى كۇش بار. ول قازاقتىڭ اۋىزبىرشىلىگى.

باسىڭداعى باسپاڭنان با ماڭگىلىك؟

قىشقا باسقان تاس تاڭباڭ با ماڭگىلىك؟

بىرگە وسكەن باۋىرىڭ با ماڭگىلىك؟

ادامداردى ءبىر-بىرىنە ايداپ ساپ،

قىرقىستىرعان كۇندەستىك پە ماڭگىلىك؟

ماحات باۋىرىم، بۇل ويلار نۇح پايعامبار سياقتى سۋدان امان قالعان اككادتىق ۋتناپشيتيدىڭ مونولوگى. قانشاما عاسىرلار وتسە دە، وسى سوزدەردىڭ ءمان-مازمۇنى جوعالعان جوق. كەشتەن تاڭعا سوزىلار جىر اۋەنىنەن ادامداردى باۋىرلاستىققا، ءوزارا تۇسىنىستىككە شاقىرعان ىزگى تىلەكتەردىڭ ءۇنى ايقىن ەستىلىپ تۇر. مونولوگ «سۇم اجال ەشكىمدى دە ايامايدى» دەپ كەلەتىن جالپىلاما وي اۋانىمەن باستالادى دا، ادامنىڭ قولىندا ەشتەڭە جوق ەكەنى، ءبارى دە قۇدايلاردىڭ ماڭدايىنا نە جازعانىمەن اياقتالاتىنىنا توقتالادى. اجال بارىنە سوڭعى نۇكتە بولماق. جاۋىزدىققا دا، مەيىرىمگە دە، ولاردىڭ ءوزارا تارتىسىنا دا. «ماڭگىلىك» ەشتەڭە جوق. ويتكەنى ەشتەڭە ماڭگىلىك بولىپ جاراتىلماعان.

«تاۋەلسىزدىگىمىز تۇعىرلى، مەملەكەتتىگىمىز عۇمىرلى بولسىن!» دەيمىز ءاردايىم. بۇل تۇرعىدا بيلىكتىڭ باستى مىندەتى مەنىڭشە، مەملەكەت، قوعام جانە جەكە ادام مۇددەسىنىڭ ۇتىمدى تەپە-تەڭدىگىن قامتاماسىز ەتۋى. وركەنيەتتى ەلدەردەن ۇيرەنەرىمىز وسى. شىنايى ادىلەتتىلىك وسىلاي ورنايدى. ءوزىمنىڭ وتكەن ءومىر جولىمدى ساپتاپ، سارالاپ قاراسام - ونىڭ قاي-قايسىسىندا دا ەڭ باستى عۇمىرلىق ۇستانىمىم - ءادىل بولۋ، ادىلدىكتى مويىنداۋ، ادىلەتسىزدىكپەن كۇرەسۋ بولىپ كەلەدى ەكەن. ءادىل مەن ادىلەتتىلىك - جادىما جاتتالىپ، جانىمدى جاڭعىرتىپ، اتا-بابالارىمنىڭ قانىمەن كەلىپ، كوڭىلىمدى اسقاقتاتىپ، كەۋدەمدى تىكتەگەن ۇعىم. وسى ۇعىمنان تۋاتىن تۇجىرىم ەلىمىزدە ادىلەتتىڭ اق تۋى تىگىلسە - قازاقتىڭ اۋىزبىرشىلىگى ورنايدى. ول كەمەل كەلەشەگىمىزدىڭ كەپىلى.

- جەتپىس جىل زامان مەن تىرشىلىك تالابىمەن زيالىلارىمىز كوممۋنيستىك يدەولوگيانى ۋاعىزدادى. تاۋەلسىزدىكتەن كەيىنگى تۇستا ۇلتتىق ۇعىم قالىپتاستى. قازىر تەك قانا ۇلتتىق باعىتپەن دامۋدى قولدايتىن توپ بار. سونىمەن قاتار ەۋروپالىق-ۇلتتىق يدەولوگيانى بىرگە الىپ ءجۇرۋ قاجەت دەيتىن زيالىلار بار. جاھاندانۋ ۇدەرىسىندە ەۋروپالىق دامۋ جولى عانا ءتيىمدى، تاڭداۋىمىز سول دەۋشىلەر دە از ەمەس. قالاي بولعاندا دا حالقىنا شىنىمەن جانى اشيتىن زيالى قاۋىم ورعا جىعاتىن ەمەس، العا باستاپ-ورگە شىعاتىن جول سىلتەۋى لازىم دەگەن نيەتتەمىز عوي. بۇگىنگى قازاق قوعامى قاي باعىتتى تاڭداعانى ءجون. ءسىز كوپتى كورگەن تۇلعا رەتىندە، ءارى وسى ءۇش توپپەن دە سويلەسە الاتىنىن ءبىلىم دەڭگەيىڭىزگە سۇيەنە وتىرىپ وسىعان ايتار قانداي ءۋاجىڭىز بار؟

- بۇل جاساندىلىق. سىرت كوزگە سولاي كورىنەرى حاق. ءبىراق ەلدىڭ دامۋى تۇرعىسىنداعى بار زيالى قاۋىمنىڭ جۇرەگىندە تۇرعان اقيقات جالعىز. ول - شىن مانىندەگى تاۋەلسىز قازاقستاندى ورنىقتىرۋ. ءبىزدىڭ بولاشاق الدىنداعى پارىزىمىز وسى. الدىمىزدا ءبىزدى نە كۇتىپ تۇر؟ سونى تۇيسىگىمىزبەن تۇسىنە الۋمىز مىندەت. الدىمەن ارماندايمىز. ارماندى جۇزەگە اسىرۋ ورايىندا ماقسات قۇرامىز. ماقسات ورىندالۋى ءۇشىن ناقتى ءىس-جوسپارىمىز بولۋى شارت. ناقتىلانعان ءىس-جوسپاردى ىسكە اسىرۋعا كىمنىڭ قانداي دەڭگەيدە قابىلەت- قارىمى بار. سونى قولمەن ۇستاتقانداي ءادىل شەشۋىمىز پارىز. بۇل تەرەڭ ءبىلىم مەن ەرەكشە جاۋاپكەرشىلىكتى جۇكتەيدى. ادامزات بالاسى سان عاسىرلار ءجۇرىپ وتكەن سان تاراۋ جولداردىڭ تاجىربيەسىنە سۇيەنە وتىرىپ العا قادام باسادى. ۇلى دالامىزدىڭ جۇزدەگەن جىلدار بويى قالىپتاسقان فيلوسوفياسىن نەگىزگى قاعيدا رەتىندە ۇستانۋىمىز مىندەت. قانشاما ۇلى دا دانا تۇلعالارىمىزدىڭ عيبراتتى ناقىلدارى ءبىزدىڭ ەرتەڭىمىزگە ەرەجە. سولاردىڭ اسىل قازىناسىن زەردەدە ۇستاپ، قاتەلىكسىز قادامدار جاساساق ءجون. قازاقستاننىڭ ءوزىنىڭ ىشكى جاعدايى جەكە دۇنيە. ورتا ازياداعى باۋىرلاس ەلدەرمەن قارىم-قاتىناسىمىز قالاي ءوربۋى كەرەك؟ ءبىر جاعىمىزدا الپاۋىت قىتاي ورنالاسقان. كەشە عانا الەمدىك يمپەريا بولعان سوۆەت وداعىنىڭ ورنىنداعى ءىزباسارى رەسەيدى دە ۇمىتپايىق. ا ق ش پەن ەۋروپا مەملەكەتتەرىنىڭ دە مۇددەلەرى تۇر. جيىرما ءبىرىنشى عاسىرعا ءبىز ۇلكەن پروبلەمالارمەن اياق باستىق. ارال مەن سەمەي پوليگونىنىڭ زارداپتارىنىڭ ءوزى عالامدىق ماسەلە.

ماحات، ءوزىڭ اڭگىمەمىزدىڭ ءالقيسساسىندا اتاپ وتكەنىندەي، «ءدىلىم» اتتى كىتابىمدا بىلاي دەگەن ەدىم. ءوزىمنىڭ ءتاي-ءتاي باسقان العاشقى قادامىمنان باستاپ، انامنىڭ:

ءتىلى جات،

ءدىنى جات،

ءدىلى جات،

جات ەلدەن تاياقتى جەپ ەدىڭ، - دەگەن جولداردى انگە قوسىپ جىرلاعانىن ەستىپ ءوستىم. سول كەزدە ءتىل مەن ءدىندى تۇسىنەمىن. ءدىل دەگەندى ۇعىنا بەرەيتىن بالامىن. ءبىراق بالا بولسام دا، بۇل ولەڭ جولدارىنداعى ەڭ ماڭىزدى ويدىڭ وسى دىلگە كەلىپ تىرەلەتىنىن بۇكىل بولمىس-بىتىمىممەن سەزىنگەندەي بولاتىنمىن. ءدىلدىڭ قۇدىرەتتىلىگى دە وسى. مىنە قازىر، ءتىل مەن دىنگە سول ءدىل دەربەستىگى ارقاسىندا ورالدىق.

مەنىڭ باعدارشامىم دا وسى - مەنىڭ ءدىلىم. ءدىلىمىز مىقتى بولسا، تاۋەلسىزدىگىمىز دە مىعىم.

- مۇحتار ومارحان ۇلىنىڭ ءبىر جازباسىنان وقىدىم. مەن ۇلىم مۇراتپەن گەگەل فيلوسوفياسىن تالقىلاساق تاڭ اتقانشا تاۋسىلمايتىن اڭگىمە باستالادى دەگەندى. اكە ارمانى، اكەنىڭ ماقتانىش سەزىمى وسى ءبىر سويلەمگە سىيىپ كەتكەندەي. ءبىر سوزىڭىزدە: «سوڭعى كەزدەردە مەن اكەم جۇرگەن جولمەن قىرعىز جەرىنە ءجيى-ءجيى كەلەمىن. قازاق-قىرعىز اراسىن بايلانىستىرعان اتا ءداستۇرىن جالعاستىرۋ مەن ءۇشىن ۇلكەن عانيبەت. اكەمنىڭ ءىسى - وسيەت»، - دەپ ايتىپسىز. اڭگىمەمىزدى اكە مەن بالا اراسىنداعى ەستە قالعان رۋحاني وقيعامان ساباقتاساق.

- مۇحتار اۋەزوۆ 1957-جىلى لەنيندىك سىيلىقتىڭ لاۋرەتى اتاندى. سىيلىق ەرەجەسى بويىنشا لاۋرەات اتاعىن العان ادام سوۆەت وداعىنىڭ كەز-كەلگەن جەرىنە بارىپ دەمالىپ تۇرۋى ءۇشىن، قالاعان جەرىنەن ساياجاي الۋعا حۇقىسى بولدى. سوندا اكەم ىستىقكولدى تاڭدادى. ون ءۇش جاسىمدا باۋىرىم ەرنار ەكەۋىمىزدىڭ ىستىقكولگە بارعانىمىز ەسىمدە. اتاقتى قىرعىز جىرشىسى، اتاقتى ماناسشى، حالىق ءارتيسى ساياقباي قارالايەۆتىڭ ۇيىنە توقتادىق. الىس-جاقىن ەلدەردەن ءبىرقىدىرۋ مادەنيەت قايراتكەرلەرى، ايگىلى اقىن-جازۋشىلار جينالعان ەكەن. ساياقباي جىرشى ماناسشىلاپ ۇزاققا جىرلاپ كەتكەن ءبىر ساتتە اكەمنىڭ جانىنا جاقىنداپ، جىراۋدىڭ نە ايتىپ جاتقانىن قۇلاعىنا سىبىرلادىم. سوندا اكەم، كوزىن جۇمىپ، جىر قۇدىرەتىنە شومعان ساياقبايدى توقتاتىپ: «مۇرات ۇلىم ءسىزدىڭ جىردى ءتۇسىنىپ، ءوز ويىن بىلايشا پايىمدادى» دەپ ءسوزىمدى وتىرعاندارعا جەتكىزگەنى ەسىمدە. جينالعان مىقتىلار مىنا سوزدەر گەگەلدىڭ تۇجىرىمىنا كەلەدى دەسىپ داۋرىعىسقان سوندا. ۇلىلاردىڭ العاشقى باتاسىن الىپ بىلۋگە، كوپ ىزدەنۋگە ۇمتىلىستىڭ باستالۋىنا سول وقيعا ەرەكشە اسەر بەردى. قازاقتىڭ بالانى جاستان تاربيەلە دەگەنى وسىدان شىققان بولار.

- ادامنىڭ بالالىق شاعى قيماستىق سەزىمگە تولى وقيعالار. سۇحباتىمىزدى وسى باعىتقا بۇرساق. مەن ەستىگەنىم مەن وقىعانىمدى تىلگە تيەك ەتسەم. ءسىزدىڭ اكەڭىز، قازاقتىڭ عۇلاماسى مۇحتار ومارحان ۇلىنىڭ عالامات تالانتى تۋرالى سان كىتاپتار جازىلدى. ال، ول كىسى قانداي اكە بولدى؟ ستاليندىك توتاليتارلىق كەزەڭدە جاسقانباي «حالىق جاۋى» تانىلىپ اتىلىپ كەتكەن ەكى مىقتى ازاماتىمىزدىڭ جەسىرى، اناڭىز فاتيما بەگىمدى جالعىز تاستاماۋىن، مەن تاڭعاجايىپ ادامزاتتىق پاراساتتىلىق، ەر ادامدار ۇلگى الار ونەگە دەر ەدىم. ول تۇستا مۇحتار اۋەزوۆتىڭ ءوزى دە قىراعى كوز چەكيستەردىڭ قۋدالاۋىندا ءجۇردى. شىعارمالارىنان «ۇلتشىلدىق» پەن «الاششىلدىقتى» ىزدەگەن اياۋسىز سىن پارتيا تاپسىرماسىمەن باسپا سوزدە ءجيى شىعىپ جاتتى. جامبىل وبلىسىنا جەر اۋدارىلعان حالىق جاۋلارىنىڭ جەسىرى فاتيما بەگىم قازاقتىڭ اردا ازاماتتارىڭ ۇرپاقتارىن قالاي امان ساقتاپ قالدى؟ سىزدەن ازداپ سىر تارتساق؟

- ماحات سۇراعان ەكەنسىز، ايتايىن. ءبىلال سۇلەيەۆ مەنىڭ شەشەمنىڭ ءبىرىنشى جولداسى. بەلگىلى قوعام قايراتكەرى، اقىن، اعارتۋشى، جۋرناليست، دراماتۋرگ. 1918-1927-جىلدارى حالىقتى جاپپاي ساۋاتتاندىرۋ ىسىمەن اينالىسىپ، جەتىسۋ ولكەسىندەگى قازاق اۋىلدارىندا ەكى جىلدىق باستاۋىش مەكتەپ، اۋدان ورتالىقتارىندا جەتى جىلدىق ورتالاۋ مەكتەپ، وبلىستا توعىز جىلدىق ورتا مەكتەپ اشۋعا مۇرىندىق بولعان. بۇل مەكتەپتەردە كەيبىر پاندەر ورىس تىلىندە وقىتىلعان. سۇلەيەۆ ەنگىزگەن بۇل تاجىريبە جەتىسۋداعى قازاق جاستارىنىڭ سوۆەت وداعىنىڭ بارلىق قالالارىنداعى جوعارى وقۋ ورىندارىنا وقۋعا تۇسۋلەرىنە مۇمكىندىك بەردى. سەمەي پەدوگوگيكالىق ينستيتۋتىن اشىپ، العاشقى رەكتورى بولدى. سەمەيدە جۇرگەندە جازىقسىز قاماۋعا الىنعان. سول قاماۋدان امان شىققان سوڭ، 1934-1937-جىلدارى قاراقالپاق اۆتونومياسىندا حالىق اعارتۋ كوميسسارى بولدى. 1937-جىلدىڭ سوڭىندا ەكىنشى رەت قاماۋعا الىنىپ، اتۋ جازاسىنا كەسىلگەن.

ءبىلال سۇلەيەۆتەن فاريدا، جانىبەك جانە ازات ەسىمدى ءۇش بالا قالدى. فاريدا ون ءبىر جاسىندا قاتتى ناۋقاستانىپ قايتىس بولادى. جانىبەك جانىپ تۇرعان ازامات ەدى. ۇلى وتان سوعىسىنا قاتىستى. ەرەكشە ەرلىگىمەن كوزگە تۇسكەن. ازات ءبىزدىڭ بارىمىزگە قامقورشى اعا بولدى.

ال، حالقىمىزدىڭ ۇلى اقىنى، ساياسي-قۇعىن سۇرگىننىڭ قۇربانى ءىلياس جانسۇگىروۆتەن ءۇمىت، يلفيا، بولات ومىرگە كەلدى. ءىلياس اتامىز اتىلىپ كەتكەن سوڭ، شەشەمىز فاتيما دا رەپرەسسياعا ۇشىراپ، مەركىگە جەر اۋدارىلادى. مەركىدە مەن ومىرگە كەلدىم. بۇل، بىلە بىلسەڭىز، ۇلكەن دۇنيە. شىر ەتىپ وسى دۇنيەگە كەلگەلى بەرگى عۇمىرىم جول ۇستىندە كەلەدى. جاسىم سەكسەنگە قاراي بەت السا دا، سول باياعىداي جولدا كەلەمىن. كوڭىل دە، جۇرەك تە، سانا-سەزىم دە ءالى دە الدەنەنى ىزدەگەندەي. جاۋابىن تاپقانداي دا بولاسىڭ. ءبىراق ول ساعىم - ساتتەر. قايتادان جول، قايتارا ىزدەۋ. بالكىم بۇل، اكە اماناتىن ىزدەۋ جولى ما؟! مەنىڭ اكەم ماعان، ياعني ءوز ۇلىنا قامقورلىق جاساۋىم پارىز دەگەن جەلەۋمەن جەردىڭ تۇبىندەگى مەركىگە ءجيى كەلىپ تۇردى. وسىلايشا ءوزىنىڭ ۇزەڭگىلەس دوستارى ءبىلال مەن ءىلياستىڭ ۇرپاقتارىنىڭ امان قالۋىنا، ءوسىپ جەتىلۋىنە سەبەپكەر بولدى. بۇگىنگى ۋاقىت بيىگىنەن قاراساق، اكەم مۇحتاردىڭ ءبىلال مەن ءىلياستىڭ بالالارىنا قامقورلىق جاساۋى - ۇلكەن ازاماتتىق ەرلىك. ادام كەشەگىسىمەن، قازىرگىسىمەن جانە كەلەشەگىمەن ءومىر سۇرەدى. مەنىڭ اكەم ۇلتىمىزدىڭ ەكى ۇلى تۇلعاسىنىڭ وسى ءۇش ساتىلىق جالعاستىعىن ساقتاپ قالدى.

ءبىز الەمنىڭ جەتى كەرەمەتىنىڭ ءبارىنىڭ دە تاريحىن ءبىلىپ، قايران قالىپ تاڭداي قاعامىز. ءبىراق جانىمىزدا جۇرگەن جانداردىڭ ىشكى دۇنيەسىن تانۋعا ۇمتىلمايمىز. مەن باقىتتىمىن. جاس كەزىمدە اكەم بولسا، قازىر اكەمدەي دانا ازاماتتارمەن دوسپىن. ولارمەن ۋاقىت تاۋىپ ارنايى كلۋبىمىزدا باس قوسامىز. تۇرمىستىق پەندەشىلىكتەن ادا سونداي زامانداستارىممەن ءاردايىم كەزدەسكەن سايىن مارقايىپ قالام. ادامدى ءومىر سۇرۋگە قۇشتار ەتەتىن دۇنيە ادال، اق نيەتتەن شىعاتىن قادامدار.

اكەم مەنى ءبىلال مەن ءىلياستىڭ بالالارىنداي تاربيەلەدى. ءبولىپ-جارعان جوق. جاقسىنى دا جاماندى دا سولارمەن بىردەي ءبولىستىم. مەركىدە قاراسۋ دەگەن وزەن بار. بالامىز. بولات اعام مەنەن بەس جاسقا ۇلكەن. بىردە سول قاراسۋدا قايىقپەن ءجۇزىپ جۇرگەندە سۋ تۇبىنە كەتتىم. قايىقتىڭ ءتۇبى تەسىك ەكەن. سوندا بولات اعام سۋعا اعىپ بارا جاتقان مەنى قۇتقارىپ قالدى. ەگەر كوكەيىندە اكەمىز بولەك دەگەن كۇپىرلىك پەندەشىلىك بولسا باسقاشا بولار ما ەدى. شەشەمىز فاتيما بەگىمنىڭ ۇيرەتكەنى مول. اكەم دە شەشەمنىڭ بالالارىن بولمەي، وگەيسىتپەي بارىمىزگە بىردەي قاراپ، بارىنشا كومەكتەسىپ وتىردى. سوعىس اياقتالىپ، اڭدۋ تىنىشتالعاندا ءبارىمىزدى الماتىعا كوشىرىپ اكەلدى. ءۇي اپەردى. بالالاردى وقۋعا ورنالاستىردى. انام فاتيما عابيتوۆا كەرەمەت جان ەدى. تابيعات كورىكتى دە، اقىل-پاراساتتى دا اياماي دارىتقان. 1956-جىلى ساكەن سەيفۋللين، ءىلياس جانسۇگىروۆ، بەيىمبەت مايلين اقتالعان تۇستا، انامنىڭ جازۋشىلار وداعى مىنبەرىنەن سويلەگەن ءسوزى جينالعان جۇرتتى تەبىرەتتى. ەل انامنىڭ ايتقانىن اڭىزعا اينالدىرىپ جالعاستىردى. ماعان انامنىڭ تۇلعاسى عاشىقتاردىڭ ءپىرى ءبيبى- فاتيماعا، وت اناسى ۇمايعا ۇقساپ كەتەتىن. ماعان انام قازاقتىڭ ءۇش بىردەي ازاماتىنىڭ ۇرپاعىن جەتىلدىرۋ ءۇشىن اللانىڭ اسپاننان جىبەرىلگەن پەرىشتەسى سەكىلدى كورىنەتىن. قازاق حالقى اناعا قاشاندا قۇرمەتپەن قاراعان. جەر انا دەيمىز. انا ءتىلى دەيمىز. ءدىلىمىزدىڭ دىڭگەگى دە انا تامىرىنا بايلانعان.

- اناڭىز تۋرالى كىتاپ شىعاردىڭىز. باسقا ەلدەردە بولسا «فاتيما بەگىم» دەگەن تەلەسەريال تۇسىرىلەر ەدى. ول ۋاقىت تا بولار دەگەن سەنىمدەمىن. ءسىزدىڭ تۇلعا بولىپ قالىپتاسۋىڭىزعا اناڭىزدىڭ دەمەۋى از بولماعان. ماسكەۋدە وقىپ جۇرگەنىڭىزدە قازاقتىڭ ماقال-ماتەلدەرىن جيناقتاپ، ءوزى ماشينكاعا ءتۇسىرىپ سىزگە جىبەرگەنىن بىلەمىز. ول دا بولسا انا ءتىلىنىڭ مايەگىن جادىندا ساقتاسىن، رۋحى قازاق، قازاققا قىزمەت قىلاتىن ازامات بولسىن دەگەنى بولار. بۇگىنگى كۇننىڭ وزەكتى تاقىرىبىنا ارنالعان رۋحاني جاڭعىرۋدى اسىل انالارىمىز ەجەلدەن-اق جۇرەكتەرىممەن سەزگەن عوي.

اڭگىمەڭىزگە راحمەت!

اۆتور: ماحات سادىق