جاڭا وقۋ جىلىندا ءبىر وقۋشىعا قانشا قارجى كەتەدى؟
بيىلعى باعانىڭ باعدارىن ءبىلۋ ءۇشىن بازارعا باس سۇقتىق. تاۋارىن ءتىزىپ قويعان ساۋداگەرلەردەن كوز سۇرىنەدى. بارلىق مەكتەپكە قاجەتتى دۇنيەنى وسى جەردەن الىپ كەتە الاسىڭ. ۇسىنىلعان تاۋارلار اراسىندا ءتۇرلى وندىرۋشىلەر دە بار.
«تۇرىكتەردىڭ كوستيۋمى ۇشتىك. ياعني بىزدە كوستيۋم 8 مىڭنان جوعارى. قىزدارعا ارنالعان كوستيۋم 4 كيىمنەن تۇرادى. يۋبكا، شالبار، جيلەتكا. بۇل بىزدە 10 مىڭنان جوعارى. وزبەكستاننىڭ تاۋارى دا بار. ساپاسى جاقسى. ەكى شالباردان تۇرادى، جيلەتكاسى مەن پيدجاگى دا بار. بارلىعى وتە جاقسى تۇرادى. بىزدە قازاقستاندا وسىلاي تىگىپ بەرسە، باعاسىن قول جەتىمدى ەتسە وتە جاقسى بولاتىن ەدى»، - دەيدى ساتۋشى فاريدا جاناروۆا.
گۇلميرا قۇربانوۆانىڭ ساۋدامەن اينالىسىپ كەلە جاتقانىنا بىرنەشە جىل بولدى. مەكتەپكە قاجەتتى قۇرال-جابدىقتىڭ باعاسى قازىر ەداۋىر تومەندەدى دەيدى. ونىڭ ايتۋىنشا، شامامەن كوپ تاۋار قۇنى 20-30 تەڭگەگە جوعارىلاعان. اتا-انا تەك داپتەر، قالامساپ قانا ەمەس، اتلاس كارتالار، باستاۋىش سىنىپ وقۋشىلارى ءۇشىن بىرنەشە پانگە قوسىمشا داپتەرلەرىن الۋ كەرەك.
«وقۋشىلار كۇندەلىگىن 400 تەڭگەدەن ساتىپ جاتىرمىز. تاعى ءبىر ءتۇرى - 500 تەڭگە. بىلتىر دا سول باعا بولعان. بيىل دا سولاي. باعانى قاتتى كوتەرگەن جوقپىز»، - دەيدى ساتۋشى گۇلميرا قۇربانوۆا.
بازاردىڭ ءىشىن ارالاپ ءجۇرىپ، بالا-شاعاسىنا كيىم-كەشەك پەن قاجەتتى قۇرالدارىن الىپ جۇرگەن اتا-انانى سوزگە تارتىپ، بارىنە ورتاق «ءبىر بالانى دايىنداۋعا قانشا تەڭگە كەتەدى؟» دەگەن سۇراق قويدىق.
«ءبىرىنشى سىنىپقا دايىنداپ جاتىرمىز. فورماسىنىڭ وزىنە ءبىر بالاعا 50 مىڭ جەتكەن جوق. ول ونىڭ وزىندە تولىق ەمەس: كوستيۋم، شالبارى جانە ەكى جەيدەسى، اياق-كيىمى، سومكەسى، بولدى. ودان قالدى، ءالى الاتىن كوپ دۇنيەمىز كوپ. كەڭسە تاۋارىنىڭ وزىنە ءبىر بالاعا 25 مىڭ كەتتى. مەكتەپتىڭ بەرەتىن تىزىمىمەن الامىز»، - دەدى اتا-انا جانسايا مولدىجانوۆا.
جازيرا قۇتپانوۆا بيىل ەكى بالاسىن مەكتەپكە دايىنداپ جاتىر. قىزى 5- سىنىپقا، 3-سىنىپقا ءوتىپتى. ولارعا مەكتەپ فورماسىن الۋدا وتاندىق تاۋار وندىرۋشىلەرگە دەن قويىپتى. ال سومكە بىلتىرعىدان قالعانمەن جۇرە بەرەدى دەپ شەشتىك دەيدى. وسى ۋاقىتقا دەيىن قىزى مەن ۇلىنىڭ تەك قانا فورماسىنا 70 مىڭ تەڭگە جۇمساعان. ءالى تاعى قۇرال-جابدىق ساتىپ الۋ كەرەك دەپ وتىر.
«كەڭسە تاۋارلارىن الايىن دەسەم، 20-30 مىڭداي اقشا كەرەك. سونداعى الاتىنىمىز قالام، داپتەرى، كۇندەلىك قانا»، - دەيدى اتا-انا جازيرا قۇتپانوۆا.
وتاندىق تاۋار وندىرۋشىلەرى ۇسىناتىن مەكتەپ فورماسى 15 مىڭ تەڭگەدەن جوعارى. ولار ءوز ونىمدەرىن قالادا ارنايى ۇيىمداستىرىلعان مەكتەپ جارمەڭكەسىندە ساۋدالاپ جاتىر.
«بۇل - قىزدارعا ارنالعان توپتاما. مۇنىڭ ىشىنە پيدجاك، جاكەت جانە شالبارى كىرەدى، باعاسى - 21500 تەڭگە. ەگەر يۋبكامەن الاتىن بولسا، 20500 بولادى. ال جوعارى سىنىپتارعا ارنالعان كوستيۋم 24 مىڭ بولادى»، - دەدى ساتۋشى ايگەرىم نازار.
كەڭسە تاۋارىنىڭ سان الۋان ءتۇرىن ۇسىناتىن كومپانيادا داپتەر 20 تەڭگەدەن ساۋدالانسا، بازاردا ونى 15 تەڭگەدەن الۋعا بولادى. ال، ءبىراق كۇندەلىك باعاسى دۇكەن سورەسىندە ەداۋىر تومەن. بالالار تاۋاردىڭ ءتۇر- كەلبەتىنە قاراپ، قىمباتىن قالاسا، اتا-انا ەڭ الدىمەن ونىڭ ساپاسىنا ءمان بەرەتىنى بەلگىلى.