قورعانىس مينيسترلىگى پاراشيۋتپەن سەكىرىپ قايتىس بولعان اسكەريگە قاتىستى تۇسىنىك بەردى

نۇر- سۇلتان. قازاقپارات – ق ر قورعانىس مينيسترلىگى الماتى وبلىسىندا پاراشيۋتپەن سەكىرۋ كەزىندە اسكەري قىزمەتشىنىڭ قازا بولۋىنا قاتىستى تۇسىنىك بەردى، دەپ حابارلايدى قازاقپارات.

«22 - تامىزدا قاپشاعاي قالاسىندا اسكەري قىزمەتشىلەر مي-17 تىكۇشاعىنان پاراشيۋتپەن جوسپارلى سەكىرۋدى ورىندادى. پولكوۆنيك س. س. الدىنعۇروۆ شامامەن 200-250 مەتر بيىكتىكتەن سەكىرۋ بارىسىندا قاۋىپسىزدىك تەحنيكاسىن بۇزعاندىقتان نەگىزگى پاراشيۋتى اعىتىلىپ كەتكەن. اسكەري قىزمەتشى قوسالقى پاراشيۋتتى قولدانعان، ءبىراق بيىكتىكتىڭ جەتكىلىكسىزدىگىنەن پاراشيۋت اشىلىپ ۇلگەرمەگەن. سونىڭ سالدارىنان پولكوۆنيك الدىنعۇروۆ قازا تاپتى»، - دەلىنگەن مينيسترلىكتىڭ مالىمەتىندە.

ۆەدومستۆو اقپاراتىنا سايكەس، پاراشيۋتتەن سەكىرۋ جاتتىعۋلارى جاۋىنگەرلىك دايارلىق جوسپارىنا سايكەس جۇرگىزىلگەن.

«سەكىرۋگە اۋا رايىدا قولايلى بولعان. الدىنعۇروۆ 100-دەن اسا سەكىرۋدى ورىنداعان. سونىڭ ىشىندە، كۇردەلى، ۇزاققا سوزىلعان، كۇندىزگى جانە تۇنگى سەكىرۋلەر بار. قازىرگى ۋاقىتتا وقيعا سەبەپتەرى انىقتالۋدا. اسكەري قىزمەتشىنىڭ قازا بولۋى فاكتى بويىنشا «اۋىر زارداپتارعا اكەپ سوققان قىزمەتكە سالعىرت قاراۋ» ق ر ق ك- ءنىڭ 453-بابى 2-بولىگىنە سايكەس قىلمىستىق ءىس قوزعالدى»، - دەدى قورعانىس مينيسترلىگىنەن.